Laugarren edizioa izango du aurtengoa, Hernaniko Lore eta Landare Azokak: «sendotuz doan azoka bat da, gero eta partaide gehiagorekin», nabarmendu zuen Luis Intxauspe alkateak atzo, Parke Botanikoan egin zuten aurkezpenean.
Zehazki, 17 izango dira, larunbatean postua jarriko dutenak, deKoloreko Juantxo Pollarcinok azaldu zuenez: «horietako zortzi, landare mintegiak izango dira, tartean Hernaniko Karabeleko; eta landare aromatikoetan edo trepadoreetan espezializatuta daudenak ere egongo dira. Beste bost postu, kosmetika naturalekoak izango dira, tartean bat hernaniarra, Irusta. Mendilore loredenda ere bertan egongo da, hazi ekologikoen denda bat ere bai, eta bi artisau, landare eta loreak erabiltzen dituztenak beraien artisau lanak egiteko». Pollarcinok eskertu nahi izan zuen, Udalaren eta Behemendiren laguntza horrelako azoka bat antolatzeko.
Goiz osoan zehar postuak, Urbieta kalean
Larunbat goizean izango da hori, 10:00etan hasi eta eguerdiko 14:30etara arte. Urbieta kalean jarriko dituzte postuak, eta helburua da, ekoizle eta erosleen arteko zuzeneko harremana sustatzea; herritarrak gerturatu eta galdetu dezatela, eta ekoizleek emango dizkiete azalpenak.
Hori azpimarratu nahi izan zuen Mendiloreko Oihane Fernandezek: «animatu daitezela galdetzera eta erostera. Eta ea txertatzen dugun egunerokotasunean, ogia erosten dugun bezala, lore eta landareak erosteko ohitura. Edozertarako izan daitezke egokiak, eta prezio guztietakoak daude, euro batetik aurrera». Intxauspek ere animatu zituen herritarrak: «beti da osasungarria, lore eta landareekin harreman hori».
Postuez gain, hiru tailer ere izango dira bertan, haurrentzat: egurrarekin eskulanak egitekoa, eta lore prentsatuarekin orri-markatzaileak egitekoa.