Greba deialdia egin dute biharko, hezkuntza publikoan, LAB, ELA eta Steilas sindikatuek, jasaten ari diren murrizketen kontra. Eta Hernaniko ikastetxeetan, jarraipen zabala izango du deialdiak.
Langile ikastolan, bat egin dute greba deialdiarekin, asanbladak hala erabakita. Ereñotzuko Txirrita eskolan ere, greba egingo dute guztiek. Elizatxon, %85 ingurukoa izango da grebaren jarraipena, eta Urumean %75 ingurukoa. Hernani Institutuan, berriz, %46ak egingo du greba. Eta Lanbide Heziketan ere izango du jarraipena deialdiak, baina daturik ez daukate oraindik.
Beste greba deialdi bat ere egin dute sindikatuek dagoeneko, maiatzaren 23rako.
Bi ekimen bihar eta etzi, Hezkuntza Plataformak
Bestalde, ostegunean daukate Heziberriko froga-pilotua, Langileko 6garren mailako ikasleek; eta horren aurrean, ikasleen gurasoek planto egitea erabaki dute. Babesa erakusteko, plantoarekin bat egin du Hezkuntza Plataformak, eta bi ekimen antolatu ditu: elkarretaratzea Zinkoenean bihar, 17:00etan, eta kalejira Plazara; eta etzi 08:30etan, Langileko zuzendaritzan bilkura, plantoari babesa emateko.