San Isidro eguna, baserritarrena, da bihar, eta hori ospatzeko, egitarau berezia antolatu da, beste behin, Hernanin. Gaur izango da, ordea, programa bereziko aurreneko ekintza; arratsaldeko 19:00etatik aurrera, Milagrosan ikusi ahal izango da Putinen guardasola antzezlana. Sarrerak salgai daude, 7 euroan.
Xentimorik Gabe antzerki konpainiaren eskutik datoz Ramon Agirre eta Inazio Tolosa aktoreak Hernanira, musikaz zein umorez betetako ikuskizuna eskaintzera.
Lehendakariaren aginduz, Euskal Herriko ereserkia konposatu beharko dute Agirre eta Tolosak, herritar orok maiteko duen doinua, hain zuzen. Hortaz, hori izango da bi protagonistek antzezlanean zehar izango duten lana, eta ikuslegoarekin batera elkarbanatuko dutena.
Bihar, egun haundia
Dena den, bihar izango da egun haundia, baserritarrak gogoan izatekoa. Horretarako, meza berezia izango da aurrena, goizeko 11:00etan San Joan Bataiatzailean. Ondoren, 11:30etatik aurrera, Bertso Eskolako hiru bertsolarik girotuko dute goiza: Eñaut Martikorenak, Beñat Mujikak eta Andoni Mujikak. Eta segidan, pelota partiduak izango dira Tilosetan; pala partidu mistoa lehenengo, eta eskuz binaka, ondoren.