Aspaldiko usadioa berreskuratuz, Atsolorra egin dute aurten ere Ereñotzun. Igandean izan zen ekitaldia Auzo Udalaren egoitzan, eta 2016an jaiotako haurrei harrera egiteko: Laura, Leire, Suar, Zuhaitz, Haizea eta Lurri, hain zuzen. Ekitaldian, baita ere, adierazi nahi izan zuten auzoak berak baduela ume horien ardura.
Ongietorria, festa giroan
Sei haurretatik, hiruk hartu zuten parte festa giroan egin zuten tradiziozko ekitaldian. Txalapartaren doinuarekin hasi zen festa; ondoren, beste urte batzuetako argazkiak ikusi ahal izan zituzten bertaratutakoek, baita iaz estreinatutako Atsolorraren inguruko dokumentala ere.
Mari Carmen Basterretxeak, liburua
Bukaeran, aurkeztu zuten Mari Carmen Basterretxearen Euskal Herria, kultura matrilineala liburua, bertan aipatzen baita atsolorraren ohitura. Auzo Etxean erosi daiteke.