Astigarragarako «estrategikoa izango da tren geltokia lortu izana», EAJ-PNVk prentsa oharrean azaldutakoaren arabera. Azpiegiturei, garraio publikoari, eta ingurugiroarekiko ardurari dagokienez, «lorpen historikoa» izango dela azpimarratu du.
Eusko Jaurlaritzaren lana, azpimarragarria
Jeltzaleek «goraipatu» egin nahi izan dute «Iñigo Urkullu Lehendakariaren gobernuak egindako lana, baina, bereziki, Arantza Tapia sailburuarena, Jaurlaritzan Ekonomiaren Garapena eta Azpiegituretako sailaren arduraduna eta Astigarragakoa dena».
Hain zuzen, «EAJ-PNVk estatu mailan izan duen negoziaketa prozesuari esker» izango du Astigarragak tren geltokia, eta horregatik, «eskertu egin nahi ditugu bai alderdiko zuzendaritza eta baita diputatu jeltzale taldea ere, bereziki gipuzkoarrak».
«Bereziki, Arantza Tapia sailburuaren lana goraipatu nahi dugu; Jaurlaritzako Ekonomiaren Garapena eta Azpiegituretako sailaren arduraduna eta Astigarragakoa dena»
Konexio aukera berriak
Egingo den geltoki honek herriari hainbat onura ekarriko dizkiola ere azaldu dute.
«Aukera berria emango dio Donostia eta Astigarragaren arteko konexioari, eta baita gure inguruko herriekin egun daukanari ere, adibidez, Hernanirekin edo Urnietarekin. Gainera, Abiadura Handiko Trenarekin edukiko duen loturari esker, Bilbora eta Gasteizera joateko bidaia 30 minutu ingurukoa izango da. Horrek aukera ezinhobea emango die euskal hiriburuetan ikasi edo lan egin behar edo nahi dutenei».
Horrez gain, «urrats haundia» izango da EAJren esanetan, «garraio publikoa hobetzeko helburu estrategikoari dagokionez, 6.000 biztanle baino gehiago dauzkan udalerria izan arren, tren geltokirik ez daukan azkenetakoa baita egun Astigarraga».
Azkenik, ingurugiroarekiko ere ona dela gogorarazi du, «CO2 isurketak murriztuko direlako».