HIRU eguneko lokatz festari emango dio hasiera gaur Sprint probak. Lasterketa motza eta azkarra izango da Hernaniko Eternal Runninga estreinatuko duena. Arratsaldeko 16:00etan hasiko da, Sagastialdeko atletismoko pista inguruan.
Beste proba bat izango da, baita ere, gaur: Ilargi betea. Iluntzeko 21:00etan hasita, gauez izango da proba, ilargipean. Ondo pasatzea izango da proba honen helburu nagusia, baina zailtasuna ere izango du, izan ere, partehartzaileek 40 bat obstakulo pasa beharko dituzte.
Lasterketa nagusia, etzi
Irekiera azkarrak, beste lau proba ekarriko ditu datozen bi egunetan. Bihar izango dira Supersprint, 10:00etan; Kids, 16:00etan; eta Bikotekakoa, 19:00etan. Igandean izango da, ordea, lasterketa nagusia, goizeko 11:00etan hasita.
Atletismoko pista, itxita
Asteburu osoan zehar egingo diren probak direla eta, Udalak jakinarazi du herritarrek ezin izango dutela atletismoko pista erabili etzira arte.
Helikopteroa, Arnasak
Lasterketa ospetsua dagoela aprobetxatuko du Arnasak, Gipuzkoako Fibrosi Kistikoaren elkarteak, helikoptero bat jartzeko. Bertan, Hegan Fibrosi Kistikoaren alde leloa irakurri ahal izango da, eta arnas-fisioterapia saioak finantziatzeko dirua ateratzea izango du helburu.