Aurrekontu Irekiak kanpaina jarri du martxan Gipuzkoako Foru Aldundiak 2018ko aurrekontuetarako proposamenak jasotzeko. Hainbat herri bisitatuko dituzte horretarako, eta Hernanin egin zuten asteartean, hirugarren geldialdia.
Karpa bat jarri zuten Plaza Berrin egun osoan zehar, eta bertan izan ziren Imanol Lasa Gobernantza eta Gizartearekiko Komunikazioko diputatua, eta Joseba Muxika, Herritarren Partaidetzarako zuzendaria.
Hernaniko bisita positiboa izan dela adierazi du Lasak, eta topaketa honen garrantzia azpimarratu du: «herritarren beharrei pultsua hartu, eta haien iradokizunak pertsonalki jaso eta entzun nahi ditugu. Aldundia zertan aritzen den azaldu nahi dugu xehetasun guztiekin, datuen bitartez esplikatuz nolako garrantzia duen Aldundiak Gipuzkoaren egunerokoan, jendea parte hartzera animatuz. Oso pozik gaude orain arte eduki dugun erantzunarekin».
Gazteekin, Lanbide Heziketan
Horren aurretik, Lanbide Heziketako ikasleekin bildu zen Imanol Lasa bera: «aurtengo aurrekontu irekietan ahalegin berezia egin nahi dugu Aldundiaren jarduera gazteenei gerturatzeko, askotan ez baitute ezagutzen erakundearen lana eta bere funtzioak, eta baita beraien kezka eta eskaerak jasotzeko ere». Oraingo honetan, hainbat kontu jarri zituzten mahai gainean: lan merkatua eta irteera profesionalak, Anoeta estadioaren eta beste zenbait kirol instalazioen eraberritzea, Aldundiaren lan eskaintza publikoak edota Kupoa.
Proposamenak, ekainaren 30era arte
Herriz herri jarriko dute karpa proposamenak egiteko. Dena den, ideiak jasoko dira ekainaren 30era arte: Gipuzkoa Plazako bulegoetan, edo gipuzkoa.eus/partaidetza web orrian.