Aurreko astean aurkeztu zuen Foru Aldundiak Elias Querejeta Zine-Eskola berria izango dena: «goi mailako prestakuntza eskainiko duen eskola bat izango dugu, aukera emango duena sorkuntza, prestakuntza eta ondare eremuen arteko harremanak indartzeko, eta sektoreari eta sortzaileei funtsezko bultzada emateko». azaldu zuen Denis Itxaso Kulturako diputatuak.
Aurkezpenean, Carlos Muguiro ere izan zen, Zine Eskolako zuzendaria izango dena.
Bertan iragarri zuten, baita ere, eraikitze-lanak bi aste barru hasiko dira, eta 227.815 euroko aurrekontua izango du. Urte amaierarako bukatuta egotea espero dute, eta ekainean irekiko dute izenematea.
Bukatzeko, izena jartzearekin esker ona adierazi nahi izan diote Elias Querejeta hernaniar ekoizleari: «Querejeta zine europearreko produktore nagusiena izan zen XX. mendeko azkeneko herenean».