Azken jardunaldietan altxa du burua Mundarrok, eta mailari eusteko behar zirenak baino puntu gehiago lortu ditu.
Puntu bakarrarekin etxeratzea nahikoa bazuen ere, asteburuan Behobiari 0 eta 2 irabazi dio, eta bederatzigarren posturaino igo da. Azken jardunaldian, datorren asteburuan, Roteta izango du aurkari, eta irabaziz gero, zazpigarren postuan bukatu dezake liga.
Partidu osoan, nagusi
Hiru puntuak etxeratzeko asmoz atera ziren zelaira Mundarroko jokalariak, eta partidu osoa kontrolatu zuten, goitik behera.
Hasieran, irabazteko grinak bultzatuta, akats batzuk egin zituzten, baina aurreneko gola lortuta, lasaitu, eta nagusi izan ziren. Etxekoak, berriz, urduritu egin ziren, eta Mundarroren bigarren gola haiek sartu zuten, beren atean.