Sagarrondoen lorealdia ospatzeko, Sagardoaren Lurraldearen Sagastiak Loretan programaren barruan, jardunaldi berezia antolatu du Iparragirre sagardotegiak iganderako.
Goizeko 11:30etatik aurrera, sagarraren eta sagardoaren sekretuen bueltan arituko dira. Horretarako, hainbat ekintza egingo dituzte: hasteko, Jakoba Errekondoren eskutik bisita gidatua egingo dute mimoz zaindutako sagastietatik; ondoren, Iparragirre sagardotegiaren historia kontatuko du Arantza Eguzkitzak; eta bukatzeko, sagardotegian egingo dute bazkaria, menu tradizionalarekin.
Hain zuzen, aukera bikaina izango da sagardoaz gozatu ahal izateko zuhaitzetatik fruituraino dagoen lanaz gozatzeko.
Erreserbak, aurretik
Iganderako planarekin bat egin nahi dutenek, aurretik izena eman behar dutela azaldu du sagardotegiak: info@iparragirre.com edo 943 33 73 70. Prezioa: helduek, 32,5 euro; haurrek, 12 euro.