Gaur hasiko dituzte Zubietan, erraustegia egiteko obrak. Eta hori dela eta, kontzentrazioak deitu ditu Erraustegiaren Kontrako Mugimenduak, Gipuzkoako herri guztietan; denetan arratsaldeko 19:00etan, eta Erraustegirik ez! Ez gure izenean lelopean.
Hernanin, Tilosetan jarri dute zita, ordu horretan, kontzentrazio zaratatsua egiteko.
«Non egongo ote gara 35 urte barru? Nola biziko dira gure ondorengoak?»
Erraustegiaren Kontrako Mugimenduak adierazi du: «ezin dugu onartu erraustegi inposatu bat, datozen 35 urteetarako, kaltetuko dituena gure osasuna, ingurumena, eta denona den finantza publikoa». Eta galdetu du: «non egongo ote gara 2051 urtean? 35 urte barru... Nola biziko dira gure ondorengoak? Nolako airea arnastuko dute? Nolako zerbitzu sozialak edukiko dituzte? Zein gaixotasun sufrituko dituzte? Nork eta zein dirurekin zainduko ditu gaixoak, zaharrak, umeak...?».
Horregatik, bat egiteko deia luzatu die gipuzkoar guztiei: «esan diezaiogun ez gipuzkoarren bizitzak 35 urterako hipotekatuko dituen erraustegiari, alferrikakoa den erraustegiari».
Asteazkenean, Lasarte-Orian
Bigarren zita bat ere jarri dute, etzi, Lasarte-Orian. Obren inaugurazio ofiziala dela eta, kontzentrazioa egingo dute goizean, Bugati ondoan, erraustegiaren sarreran. Eta Maiatzaren 27an, Errausketaren Kontrako Eguna ospatuko dute, Zubietan.