Asteburu osorako irteera antolatu du Mendiriz Mendik, aste honetan, gaztetxoentzako; familia giroan egiteko, alegia. Artikutzara joango dira, Nafarroan dagoen ingurune babestura, ostiral arratsaldean abiatuta: elkartetik bertatik aterako dira, 18:00etan.
Eta igandera bitarte, ezagutuko dituzte «bertako basoak, errekak eta natura-altxorra, familia giro eder batean», aurreratu dute. Horregatik, animatzeko deia luzatu dute: «natura gustuko baduzu, anima zaitez!».
Azaldu dute, gainera, nahikoa izango dela mendiko material arrunta, egingo dituzten ibilbideetarako. Izan ere, zailtasun berezirik gabekoak izango dira. Edozeinek egiteko moduko ibilbideak prestatu dituzte, hain zuzen ere.
Izena emateko aukera, gaur eta ostegunean, elkartearen bulegoan
Joan nahi duenak, bi egunetan dauka apuntatzeko aukera: gaur bertan, edota ostegunean, irteeraren bezperan.
Mendiriz Mendi elkartearen bulegoan (Iturregi plaza) egin behar da, ohiko ordutegian: arratsaldeko 20:00etatik iluntzeko 21:00etara.
Irteerari buruz informazio gehiago jaso nahi duenak ere, bulegora azaldu besterik ez dauka, ordutegi berean.