Gaur hasiko du bere ibilbidea Hernanik, kluben arteko torneo garrantzitsuenean; Berria Txapelketan. Final zortzirenetan sartuko dira hernaniarrak, eta Markina izango dute aurrean; goizeko 11:00etan hasita, kiroldegiko frontoian.
Kanporaketa berdindua espero da, bere indarguneak eta ahulguneak baitauzka talde bakoitzak. Hernaniarrak dira faborito kadete mailan, eta markinarrak jubeniletan; nagusietan, aldiz, berdinduagoa espero da partidua, eta horrek erabakiko du, seguruenik.
Xabier Salaberria eta Oihan Zugasti izango dira kadete hernaniarrak, eta Gipuzkoako txapeldunorde izan ondoren, faborito izango dira, Sololuze eta Azpiazuren kontra.
Alderantziz gertatzen da jubeniletan: Garikoitz Arizmendi eta Ekaitz Insausti maila onean ari diren arren, Euskal Herriko txapeldunak dira Agirremalloa eta Ibarloza.
Esperientzia alde, Hernanik
Beraz, litekeena da banakoarekin iristea seniorren partidura. Esperientzia haundiko bikotea osatzen dute Paul Ojuelek eta Eneko Aizpitartek, baina Albizu eta Urizar gazteak maila polita ematen ari dira. Beraz, hernaniarrak faborito izango diren arren, partidu ederra espero da.
Herritarrei deia, bertaratu eta pelotariak animatzeko
Txapelketaren garrantzia dela eta, taldeak deia luzatu die herritarrei, frontoira hurbildu eta Hernaniko sei pelotariak animatzeko. Azaldu dute, gainera, laster hasiko dela Herriarteko Txapelketa ere.