Aurten ere jarri dute martxan Guraso Eskola, Hernaniko Udaleko Zerbitzu Sozialek. Eta maiatza eta ekainerako, ikastaroa antolatu du, gurasoak seme-alaben heziketan «gehiago eta hobeto inplikatzeko». Bi taldetan banatu dute ikastaroa: batetik, 0-11 urte bitarteko haurren gurasoak; eta bestetik, 12-18 urteko gaztetxoen gurasoak. Guztiek ere, Biterin emango dute.
Aurreneko taldeak, goizez izango ditu saioak, 11:00etan hasi eta 12:30ak arte. Bost saio izango dira guztira: maiatzaren 8an, 15ean, 22an eta 29an, eta ekainaren 5ean.
Eta bigarren taldeak, arratsaldetan emango du ikastaroa, 15:00etatik 16:30etara. Haiek ere, bost saio izango dituzte: maiatzaren 10ean, 17an, 24an eta 31n, eta ekainaren 7an.
Izena emateko aukera, etzi arte telefonoz
Nabarmendu dute, ikastaroak dinamika partehartzailea izango duela, gurasoekin ekintzak, esperimentuak eta jolasak eginez, «seme-alabekiko harremanerako gaitasunak eskuratzeko». Eskainiko dizkiete informazioa, formazioa eta aholkularitza, «seme-alaben behar psikoafektiboei erantzuna emateko garaian lagungarri izango dituztenak», aurreratu dute.
Ikastaroan apuntatu nahi duenak, etzi arte dauka izena emateko epea. Telefonoz egin behar da: 943 55 78 54 zenbakira deitu, eta Ana Goñirengatik galdetu.