Urte hasierarekin batera, dagoeneko prest daude abenduko auzo batzarrean Auzo Udalak hitz-emandako lanak: Fagollagan markesina jartzea, bolatokiaren konponketa, eta Pagoagako iturrian aska berria jartzea.
Fagollagako markesina, auzotarrek eskatuta
Ereñotzuarrek hala eskatuta, autobus-geltokia jarri berri du Auzo Udalak Fagollagan; auzogunearen erdialdean jarri dute, hain zuzen, zubitik gertu eta Hernanirako norabidean: «Ereñotzu auzoan zehar bi autobus linea arrunt ibiltzen dira, baita eskoletako garraio zerbitzukoa ere», azaldu dute. Horregatik, «bi linea nagusienek egiten zuten geldiuneen erdian» jarri dute.
Horretarako egindako lanak izan dira: «zolata eraikitzea, markesina bera jartzea eta argiztatzea». Dena den, azken xehetasuna falta dela azaldu dute, izan ere, «Foru Aldundiak geltokia seinaleztatzea eskatu du».
Lanak, denera, 7.500 euroko kostua izan du.
Bolatokia, konponduta
Auzoko bolatokian ere, hainbat lan egin dituzte, teilatua eta egurrezko egituraren hainbat atal egoera txarrean zeudelako. Horrela, bada, egindako lana da: «zutabeen oinarriak ordezkatu, habexken zati ustelduak ordezkatu, teilatuaren egitura indartu ostikoak jarrita, eta teilak eta ur-isurbide berriak jarri». Hori egin aurretik, gainera, «inguruan zeuden platanondoak eta zuhaitzak kimatu dira», azaldu du Auzo Udalak.
Horrez gain, «tokako tiralekua ere berritu da, hhezetasunak egindako kalteak zirela eta, zaharberritzea behar baitzuen». Bestalde, kanpoaldera ematen zuen iturria, kanpoko iturri publiko batengatik ordezkatzeko asmoa dute. Hori guztiak, 30.000 euroko kostua izan du.
Iturriak, aska berria
Pagoagako iturriko aska berritzea izan da Auzo Udalak egindako hirugarren lana. 600 euroren truke, harrizko pieza bakar batez egindako aska jarri dute: «jende asko joaten da, orain ere, aspaldiko ohiturari jarraituz, iturri honetara ura hartzera eta auzotarren laguntzari esker, ur emaria eta iturria bera kontserbatzeko ahaleginak merezi izan du», onartu dute.