44 urteko kartzela zigorra ezarri die Espainiako Auzitegi Nazionalak, Beinat Aginagalde eta Joanes Larretxea hernaniarrei, Inazio Uria enpresariaren hilketa egotzita.
Zehazki, hilketa terrorista, atxiloketa ilegal terrorista, auto baten lapurreta helburu terroristarekin, eta kalte terroristak eragiteagatik kondenatu ditu auzitegiak.
Auzitegiak dio, zalantzarik ez dagoela, ETAko Ezuste komandoak eragin zuela Uriaren heriotza, 2008ko abenduaren 3an; eta komando horretan, Larretxea eta Aginagaldek hartzen zutela parte.
Bestalde, Uriaren alargunari eta seme-alabei 400.000 euroko kalte ordaina ordaindu beharko diete kondenatuek, epaiaren arabera.