Aurreko ostiralean egin zuen informazio eta kontu-emate batzarra, Orain Hernanik; eta bertan azaldu zizkieten herritarrei, udal taldeak eta Hernaniko Podemos-Ahal Duguko kideek azkeneko bi urteotan egindako lanak; eta baita legegintzaldiari geratzen zaizkion bi urteetarako erronkak.
«Orain arte, gure posizio minoritariotik, tokatu zaigu mahai gainean jartzea gai interesgarriak, eta aurkeztea herriko bizilagun-kolektiboen proposamenak. Udaletxean lan egitea, armiarma sarea bezalakoa da», azaldu zuten.
Eta adierazi zuten: «lotu egiten zaitu hainbeste bilera, burokrazia eta paper edukitzeak, baina ez dugu herritarren gertutasunetik urrundu nahi». Izan ere, uste dute herritarrek jakin behar dutela, zer egiten ari diren beraien ordezkariak: «batzar hau, inongo zalantzarik gabe, higiene demokratikoaren beste erakustaldi bat da. Horrelako ekintzak behar dira, erakunde publikoetan gardentasun haundiagoa lortzeko».
«Ukondoz ukondo egin nahi dugu lan herriko elkarteekin»
Aurrera begira, azaldu zuten lan egingo dutela «aurrekontu hitzarmena bete dadin. Proposamenak aurkeztuko ditugu bitartekaritza, kirola eta turismoarekin lotuta, eta presionatuko dugu herriak dituen arauak errespeta daitezen».
Txotx denboraldiaren balorazioa ere egin zuten: «gauza bat da sagardotegi barruan gertatzen dena, eta bestea kaleetan gertatzen dena. Ez zaigu gustatzen Hernanin sortu den modelo soziala. Gure kaleetan gertatzen dena ez da kultura. Arazoa ez da Kaxkoko bizilagunena bakarrik, eta beraz, Hernani guztia parte den herritar-foro bat sortu behar dugu».
Eta azkenik, eskerrak eman zizkien herriko talde sozialei: «elkarte askorekin bilerak egin ditugu, beraien beharrak ezagutzeko, baina ez dugu anekdota bezala utzi nahi. Ukondoz ukondo egin nahi dugu lan beraiekin», adierazi dute.