Ia bukaerara arte izan ditu gertu jaitsieraren mamuak, Hernanik, Emakumezkoen Euskal Ligan. Baina azkenean, uxatu bakarrik ez, postu bikaina ere lortu dute, seigarren bukatuta, Euskal Ligan lortu duten bigarren postu onena, larunbatean 2-1 irabazita Ariznabarrari.
Beraz, positiboa bakarrik izan zitekeen, Gorka Alvarez eta Ane Ibarburu entrenatzaileen, eta Andrea Isasa kapitainaren balorazioa: «oso orekatua da txapelketa, eta aurreneko bostak kenduta, oso paretsu gaude denak; baina horrelako liga luze batean, bakoitzak bere tokian bukatzen du, eta guk, urteko posturik onena lortu dugu bukaeran».
Helburua zen, hasieratik jaitsieratik aldentzea, eta hortik aurrera, sailkapenaren erdialdetik gora bukatzea: «ez dugu aurreneko hori lortu, kosta zaigu aldentzea, eta beti izan ditugu gertu jaitsiera postuak. Jokua ona zen, baina emaitza onak ezin kateatu ibili gara. Nabarmentzekoa da, etxean oso indartsu aritu gara, baina kanpoan asko kostatu zaigu».
«Oso ondo etorri zaigu, Gorkak taldera ekarri duen filosofia aldaketa»
Ados daude Isasa eta Ibarburu, asko aportatu diola Alvarezek taldeari: «Gorka sartzearekin, modu bertikalean jokatzetik horizontalera pasa gara, baloia gehiago ikutu eta jokatzera. Eta ekarri dituen arau batzuetara ez geunden ohituta, baina oso ondo etorri zaigu filosofia aldaketa. Klubak apustua egin zuen udaran, aurrerapauso bat emateko nesken futbolean, eta ondo atera da».
Alvarezek gaineratu du, berarentzat «ezinbestekoa» izan dela Ibarburu ondoan izatea, «futbola gustatzen zaion pertsona bat, futbolaz dakiena eta taldea ezagutzen duena».
«Taldean oso giro ona dago»
Hiruek nabarmendu dute, taldean «oso giro ona» dagoela, eta horretan, kanpotik etorri diren jokalariek ere asko aportatu dutela, eta baita futbolistikoki ere.
Baina bereziki, Alvarezek nabarmendu nahi izan du, jubenilen taldetik igo dituzten bi jokalariek, Oihanek eta Loreak, izan duten jarrera, «asko eman digute»; eta gutxi jokatu arren, beti lanean aritu diren jokalariena ere bai.
Isasak eskerrak eman nahi izan dizkie, azkenik, nesken futbolaren alde hainbeste lan egiten dutenei: «ezkutuan geratzen den lana da, baina horren islada da, klubean daukagun nesken talde kopurua», nabarmendu du kapitainak.