Komikien hilabetea izango da maiatza, eta bi zita berezi jarri ditu Gaueko komiki dendak. Gaurkoa izango da, aurreneko egun seinalatua: Eskola Jazarpenaren Kontrako Nazioarteko Eguna da gaur, eta horrekin bat eginez, gaiarekin lotutako komiki bat oparituko die Gauekok, maiatzean zehar dendara hurbiltzen diren guztiei: Los Vengadores: Acoso nunca más.
Doako Komikiaren Eguna, maiatzaren 13a
Eta bigarren zita berezia, maiatzaren 13koa izango da, Gaueko komiki dendan: Doako Komikiaren Eguna ospatuko dute.
Estatu Batuetan, 2002 urtetik ospatzen dute Free Comic Book Day, egun horretan; eta iniziatiba horri jarraituz, 2010 urtean jarri zuten martxan Doako Komikiaren Eguna, Euskal Herrian eta Espainian. Zortzigarren edizioa izango da aurtengoa, eta guztira, 40.000 komiki oparituko dituzte, 100 bat komiki dendatan; tartean, Gauekon: egun horretan dendan sartzen den edonori, komiki bat oparituko diote. 11 komiki desberdinen artean aukeratu ahal izango dute, debalde etxera eramateko.
Eta eguna ospatzeko, Catan mahai jolasaren txapelketa ofiziala ere jokatuko da, komiki dendan bertan.