Erorketak izan ziren protagonista, beste asteburu batez, Astigarragako txirrindularien artean. Lurrean bukatu zuten lasterketa, Aimar Olasagastik Usurbilen, eta Jaime Romerok Altsasun.
Aketza Bolado 6garren, Usurbilgo lasterketan
Asteburuko emaitzarik onena, Aketza Boladok lortu zuen, Usurbilgo lasterketan. Larunbatean zeukaten proba alebin eta infantilek, eta 85 txirrindularik hartu zuten parte; horietako 33 alebinak, eta tartean, lau astigartar. Bolado izan zen helmugan aurrenekoa, eta atzetik sartu ziren Tasio Semperena, 12garren, eta Unax Aranburu, 28garren. Lasterketa buruan zijoan Olasagasti, aurreneko aldiz helmugatik pasatzean erori zenean. Erretiratu behar izan zuen, baina ez dauka lesiorik, zauriak bakarrik; eta beraz, gaur Astigarragako Txirrindagan lasterketan parte hartuko du, arazorik gabe.
Romero, lasterketetatik kanpo lau-sei aste
Eta erori egin zen Romero ere, Altsasun; baina berak ez zuen zorte bera izan: haustura bat dauka, eta lasterketatik kanpo egon beharko du lau eta sei aste bitarte, errekuperatzeko.
Burunda Saria zegoen jokoan Altsasun, Gaztetxoak Torneorako puntuagarria. Eta lasterketa bikaina egin ondoren, Altamirako portua jaisten, erori egin zen astigartarra, helmugarako 10 kilometro besterik ez zirenean falta.
Momentu horretan, lasterketa buruan sartu nahian zebilen Romero. Hamar bat laguneko taldea osatu zen aurrean, tropeletik ihes eginda, eta talde horri segika zijoan astigartarra, jaitsierako azkeneko kurban, errepidetik atera eta erorketa gogor bat izan zuenean. Minez geratu zen, eta ospitalera eraman zuten berehala.
Medikuen probek konfirmatu zuten, haustura bat daukala, eta atsedena behar duela.