Garai bateko ohitura berreskuratuz, 2012an egin zuten atsolorra Ereñotzun, auzotarren arteko elkartasuna eta auzolana bultzatzeko asmoz; eta ordutik ez dute hutsik egin. Igande honetan egingo diete ongietorri festa, iaz jaiotako sei haur ereñotzuarrei. Auzo Etxean izango da, areto nagusian, arratsaldeko 17:30etan.
Atsolorra izaten zen, auzoan haur bat jaiotakoan, amari eta jaio berriari egiten zitzaien bisita, bilera, merienda, ospakizuna... Berreskuratu dutenetik, hala ere, gaurko garaietara egokitu, eta udaberriro ospatzen dute, aurreko urtean jaiotako haur guztien atsolorra, egun berean. Sei urte hauetan, 45 bat haurren atsolorra egin dute: «auzoarentzat, haur hauek etorkizuna eta auzoaren biziberritzearen adierazgarri dira. Denon artean zaintzeko ardura hartzen da, nolabait, garai batean egiten zen bezala. Gainera, azken urteotan auzora etorri diren familiei harrera egiteko ere balio du».
Musika saioa, bideoa, eta merendola denentzat
Haurrei ongietorri beroa emateko, abesti ezagunak kantatuko dituzte denek, txalaparta hotsen artean, Idoia Arriola eta Kristiñe Solanoren laguntzarekin. Gero, Bizimodua Auzolanian proiektuko bideoa jarriko dute, auzoko emakumeen testigantzak jasotzen dituena. Eta bukatzeko, merienda ederra egingo dute, ohiturazko gisatuarekin eta arroz esnearekin, eta auzotarrek prestatutako jakiekin.
Hori bai, atsolorrera agertzeko asmoa dutenei, eskatu diete aurrez abisatzea: 943 55 10 00 edo 699 480 007.