Hilero bezala, asteazkenean bildu zen Astigarragako Udaleko Plenoa ohiko deialdian, eta bertan landu zituzten gai-ordenak zehazten zituen bederatzi gaiak, eta batzarraren aurretik onartutako beste bat.
Azken hori izan zen, hain zuzen, Oier Gomezen egoerari buruz EH Bilduk proposatutako adierazpen instituzionalerako testua. Aho batez onartu zuten gai-ordenean sartzea, bederatzigarren puntu gisa, baina Zorione Etxezarraga alkateak adierazi zuenez, «mozio gisa bozkatzeko».
Horren ondoren, aurreko Plenoko akta bozkatzeari ekin zioten; eragozpenik gabe, eta aho batez onartu zuten.
Zarkumendegiko zabalpenaren puntua, berriz ere, atzeratuta
Aurreko Plenoan bozkaketa atzeratuta, asteazkenean ziren bozkatzekoak Zarkumendegiko Zabalpenaren inguruko aldaketa. Baina, berriro ere, atzeratu egin zuten, «gehiengorik ez dagoelako», azaldu zuen Etxezarraga alkateak.
Andoni Gartzia EH Bilduko bozeramaileak argi hitz egin zuen: «guk 11 alegazio egin dizkiogu proiektuari, baina batez ere bat, aisialdi gune bat planifikatzearena, garrantzitsua iruditzen zaigu. Hori onartuko balitz, alde bozkatuko genuke».
Gerakinari buruz, eztabaida
Laugarren eta bosgarren puntuak kontu-hartzailearen berri emateei zegozkien: aurrenekoa, 2016ko likidazioaren inguruko datuak ematen dituena; eta bigarrena, Udalaren finantziazioaren berri ematen duena.
Likidazioaren arabera, beraz, Udalak 2.860.154,31 euroko gerakina izan zuen 2016an. Eta zifra horren harira sortu zen eztabaida, hain zuzen, Andoni Gartziak aurreko Plenoan onartutako kontu-hartzailearen ohar bati erreferentzia egin zionean: «aurreko Plenoan hartutako erabakiaren arabera, diru hori ezin da erabili». Eta jarraian, galdera luzatu zion udal gobernuari: «noiz erabili ahal izango da gerakin hori?».
Alkateak eta Jon Arregi ogasun zinegotziak erantzun zioten, haur eskola, DBH, kultur etxea eta Zarkumendegiren berrurbanizazioaren proiektuen txostenak eta kopuruak jakin behar direla horretarako. Eta Etxezarragak zehaztu zuen: «gauza batzuk ez daude gure esku, eta agian, aurreko Plenoan hartutako erabakia aldatu egin behar da, asko atzeratzen bada».
Bost puntu, aho batez onartuta
Beste gai batzuk, ordea, aho batez onartu zituen apirileko Plenoak. Horiek izan ziren: berdintasun saileko arlo arteko lantalde teknikoa sortzea; Goikoetxe eta Bortoene baserrien inguruko herri-bidearen eta landalurreko 9garren partzelaren inguruko ikerketa-espedienteen ebazpenak; eta 6 etxebizitza eta 450 m2ko lokalaren titulartasuna eskuratzea.
Azken horren inguruan, Gartziak adierazi zuen sentsazio gazi-gozoa zutela: «pozez gaude etxebizitza hauek eskuratu direlako, baina triste, Udalak ez duelako ezer egin gehiago eskuratzeko».
Udal gobernuak, bere aldetik, azaldu du: «Kontxa Etxeberria plazako 6 etxebizitza jasoko ditu Udalak eta babes ofizialekoak izango dira». Horretarako oinarriak prestatzen ari direla jakinarazi dute, eta aurten egingo dela zozketa.
Aho batez onartu zen, baita ere, Oier Gomezen inguruko mozioa: «gogoeta politikoarekin bat etorri edo ez, mozioarekin bat gatoz», onartu zuen Etxezarragak.
Kontu-hartzaileari agurra, bukaeran
Hainbat gaiei buruz galdetu zuen Andoni Gartziak: Harrera Planaren jardunaldiari, Haur Eskolari, edota edukiontzi sistemaren inplantazioari buruz.
Bukatzeko, kontu-hartzailearen azkeneko Plenoa zenez, agurtu zuten hiru bozeramaileek: «Udalari egin diozun ekarpenagatik, eskerrik asko!».