Orain Hernanik 1.000 euroko diru-laguntza eman dio Pasaportes para Siria elkarteari, eta honek BelgrAID GKEari (ONG) bideratu dio.
Belgradon, errefuxiatuen artean egunero 2.000 otordu bero eta arropak banatzen dituen egitasmoa da hau.
«Errefuxiatuen krisia
desagertzen ari da,
albistegietan»
Orain Hernanik azaldu du «guztion betebeharra» dela, «errefuxiatuen gaiaren inguruan beste aldera ez begiratzea; krisia desagertzen ari baita albistegietan, baina gero eta egoera larriagoa daukate gerratik ihes egin duten milaka lagunek, eta Europak bizkarra eman die. Herritarrak gara egoerari aurre egiten saiatzen ari garenak».
Lehenago ere eman du laguntza Orain Hernanik, Atenasko City Plazarako, eta orain, Serbiara bideratu du.
Itziar Villalba hernaniarra Pasaportes para Sirian aritzen da laguntzen, eta «boluntarioek martxan jarritako proiektua» dela azaldu du. Almazena egokitu eta sukaldea jartzeak 20.000 euroko inbertsioa behar izan du, eta janaritan, egunero, 1.000 euro behar izaten dira.
Ipuina edota laguntzak, errefuxiatuentzat
Horrela nahi duten hernaniarrek ere badaukate aukera, Pasaportes para Siria elkartea lagundu eta Atenaseko City Plaza eta BelgrAID egitasmoetako errefuxiatuei diru bidaltzeko.
Batetik, zuzenean dirua sartu daiteke kontu korronte honetan: ES23 3035 0332 25 3320011365. Bestetik, Zorionekoa naiz (Tengo mucha suerte) ipuina erosi daiteke www.pasaportesparasiria.es webgunean; gerraren ondorioz guztia galdu dutenen inguruko istorioa.