Hernaniko Sarek arratsaldeko 19:00etan Zinkoeneako iturrian egingo den mosaikoan parte hartzeko deia egin die herritarrei, «Oier Gomez eta larriki gaixo dauden beste presoen egoera (gurean Gari eta Ibon) salatzeko eta elkartasuna adierazteko».
Sarek uste du «Oierren kasuak mugarri izan behar duela, gaixorik dauden preso guztien egoera konpontzeko», eta horregatik, laguntza eskatu die herritarrei.
Maiatzean, Gasteizko manifestaziora
Era berean, gaurko mosaikoan parte hartzeko deia egiteaz gain, maiatzaren 6an Sare Herritarrak manifestazio orokorra deitu du Gasteizen, «larriki gaixorik dauden presoen eskubideen alde», eta bertara joateko autobusak jarriko direla jakinarazi du.
Hernanin bihartik aurrera jarriko dituzte autobuserako txartelak salgai, Garin, Txili eta Kitto tabernetan.