Sant Jordi edo liburuaren nazioarteko eguna izan zen joan den igandean, eta egun berezi honen harira, urtero antolatzen dira ekitaldi bereziak Astigarragan. Ipuin musikatua izango da aurtengoa, gaur, arratsaldeko 19:30etan hasita, kultur etxean eskainiko dutena, hain zuzen.
Helduentzako saioa izango da; interesa duten herritar guztiei irekia eta sarrera debalde izango da.
Maite Arresek kontatuko ditu ipuinak eta alboan izango du biolinjolea.
Musika eta amodiozko kontakizuna, bat eginda
Emakume Eskeletoak taldeak eskainiko du ikuskizuna, Amodiozko Ipuinak izenburupean. Hala, Maite Arrese aktoreak kontatuko ditu
ipuinak, eta bere alboan izango du Mau Ziemkiewicz biolinjolea ikuskizuna musikaz girotzen.
Hain zuzen, emanaldian zehar lau ipuin kontatuko ditu Arresek, horiek guztiak maitasun mota desberdinei buruzkoak. Eta aldi berean, Ziemkiwicz musikariak biolin doinu ezagunak eta inprobisatuak joko ditu. Horrek ahalbidetuko du atmosfera intimo batean murgiltzea ikuslegoa.