Unax Zubeldia hernaniarrak Basauriko Ganorabako komiki lehiaketan Euskarazko Akzesita irabazi du. Unaxek egin duenak badu meritua. 14 urte ditu eta atera duen saria ez da umeen kategoriakoa, baizik eta kategoria orokorrekoa.
Ainara Azpiazu ‘Axpi’ ilustratzailearen ikaslea da Unax Zubeldia. «Andrekale 2ko tailerrean komiki lehiaketa bati begira proiektua egitea proposatu nien ikasleei, istorio luzeak lantzeko. Lau orritako istorio bat sortu zuen ikasle bakoitzak, eta Unax Zubeldiak bakarrik bukatu zuenez berea bidali nuen».
Emaitza ezin hobea izan da lorturikoa. Basauriko Ganorabako komiki lehiaketan, martxo bukaeran, Euskarazko Akzesita eman baitzioten hernaniar gazteari. «Sari honek ez du adin kategoriarik, baizik eta aurkeztutako euskarazko lanik onenari ematen zaio. Baina Unaxek 14 urte ditu, eta marka haundia dela iruditzen zait» dio Axpik.
Andrekaleko klaseek eman diote aukera hori. Aurkeztu ahal izan da eta klase horiek gabe ez litzateke aurkeztuko. «Hiru hilabete egon gara buru belarri lanean proiektuan eta horri esker irabazi du».