Oroimen historikoa ikertu eta landu, egia azalera atera eta belaunaldi berriei transmititu, «gazteek gure herriko historia ezagutu dezaten». Hauexek lirateke Gipuzkoako Foru Aldundiaren lehentasunak memoria historikoaren arloan, Maribel Vaquero Bizikidetza eta Giza Eskubidetako foru zuzendariak azaldu duenez.
Helburu hauei jarraiki aurkeztu du foru arduradunak aurtengo oroimen historikoko diru laguntza deialdia, 132.000 euro baino gehiago dituena. «Aldundiarentzat egia ezagutzea, justizia eta erreparazioa, ezinbesteko helburuak dira, eta berriro errepika ez dadin, lan berezia egin nahi dugu ikerketan eta transmisioan», adierazi du Vaquerok.
Eskaerak maiatzaren 15era arte egin daitezke
Vaquerok azaldu duenez, deialdia aste honetan ireki da, eta eskaerak aurkezteko epea 2017ko maiatzaren 15ean amaituko da. Bi lan lerrotan banatzen da: alde batetik, udalentzako lerroa, 50.000 eurotakoa eta bestetik, elkarteei zuzendutako 82.200 eurotako beste lerro bat. Azaldu duenez, lehen lerrora 12 proiektu aurkeztu ziren pasa den urtean, guztira 15 udal (lau udalek proiektu bateratua aurkeztu baitzuten). Elkarte memorialisten kasuan, berriz, 21 proiekturentzako diru laguntzak esleitu ziren, ikerketa eta transmisioaren esparruetan gehienbat.
21 proiektu hauen artean dago Orbel Haizea ekimena. Irungo Udalak duen programa hau 2012an jarri zen martxan, eta Gipuzkoako Foru Aldundiaren laguntza jaso du bitarte honetan. Frankismo garaian izan ziren giza eskubideen urraketen transmisio historikoa gazteei helarazten dien proiektua da Orbel Haizea.