Lau bidaia berezi antolatu ditu Elkartuk, Gipuzkoako Gutxitasun Fisikoa duten Pertsonen Federazio Koordinatzaileak, uda honetarako. Izan ere, Elkarbidean 2017 programaren barruan, desgaitasunen bat duten pertsonei zuzendutako bidaiak prestatu dituzte: «bereziki pentsatuta daude, desgaitasun fisiko, organiko edo sentsoriala duten pertsonentzako», azaldu dute.
Elkarbidean 2017 programa, Gipuzkoako Foru Aldundiko Gizarte Politikako Departamentuaren laguntzarekin jarri du martxan elkarteak: «helburua da, bermatzea desgaitasuna duten pertsonek duten eskubidea, aisialdiz aukera berdintasunean gozatzeko».
Calpe, Salou, Munich eta Marina d’Or, aukeran
Horretarako, lau tokitara antolatu dituzte bidaiak: Munich, Calpe, Salou eta Marina d’Or. Calpera izango da aurrenekoa, ekainaren 3tik 17ra; Saloura bi datatan joateko aukera izango da, uztailaren 1etik 15era, edo abuztuaren 12tik 26ra; Munichera, uztailaren 30etik abuztuaren 6ra; eta Marina d’Or, irailaren 24tik urriaren 8ra bisitatu daiteke.
Informazioa, udaletxean
Bidaia horietan interesa daukaten herritarrek, Astigarragako udaletxean aurkituko dute informazio guztia: «elkarteak laguntza eskatu digu, programan parte hartu nahi dutenek, beharrezko informazio guztia jaso ahal izateko. Udalak egitasmoa bultzatu nahi du, eta hortaz, interesa daukaten astigartarrek, informazio gehiago eska dezakete Udaleko Gizarte Zerbitzuetako sailean», azaldu du Astigarragako Udalak.
Izenemateak, elkartearen web orrian: ‘www.elkartu.org’
Izena emateko, beharrezkoa da 16 urtetik gorakoa izatea, eta lehentasuna izango dute, desgaitasun haundiagoa duten herritarrek, eta behar bereziko egoeretan daudenek.
Izenemateak, egin daitezke Elkarturen web orriaren bidez, www.elkartu.org; edo Donostiako Ondarreta pasealekua 5eko lokalean. Ostirala baino lehen egitea eskatu du elkarteak.