Urteak daramazki Kaxko Elkarteak Hernaniko alde zaharraren alde lanean. Mota askotako ekintzak egiten ditu urtero, baina beraiek kezkati dira: «herriak ez du elkartea ezagutzen», dio Alberto Blanco Kaxko Elkarteko lehendakari berrautatuak.
Antolatzen diren ekimenen alde
Blancok berak, eta baita Kaxko Elkartea osatzen duten kideek argi daukate: «Kaxkoa bizirik mantentzea da gure nahia». Eta horretarako, diotenez, «gure helburua da gauzak egitea Kaxkoaren alde»; baita besteen ekimenak babestea ere: «Kaxkoan eta Kaxko historikoaren alde egiten diren ekintzak babesten ditugu».
Baina ezinegona ere azaldu dute: «Kaxkoan agertzen diren pintadek kezkatzen gaituzte, baita Kaxkoaren beraren balio historikoak».
Web-orria ireki berri du Kaxko Elkarteak, bere jardueraren berri emateko: kaxkoelkartea.eus
Txotx denboraldia, beste ekintza bat gehiago
Txotx denboraldiaren ondorioek ere kezka sorrarazten diete, baina ez da Kaxkoak daukan arazo bakarra: «badirudi Kaxkoa txotxa bakarrik dela eta ez da hala. Argi utzi nahi dugu gu ez gaudela txotx denboraldiaren aurka. Guk nahi duguna da jendeak ondo pasatzea baina modu zibilizatu batean; kontua ez da zer egiten den, baizik eta nola egiten den». Horretarako, onartzen dute ezinbestekoa dela «bizilagun guztien arteko lankidetza».
Komertzioaren egoera ere, okerrera
Herriko komertzio txikiaren inguruan ere, badute zer-esana: «krisiarekin denda txiki asko itxi dira, eta ondorioz, lana galtzen da, eta bizitza ere bai». Eta hori azken urteotan asko nabaritu dela diote, batez ere, giroan: «ahal dugun heinean, beraz, herriari bizitza nola eman pentsatu behar dugu». Gainera, gai honetan, administrazioak lagundu beharko lukeela aldarrikatzen du Kaxko Elkarteak.
Ekintza asko, urtean zehar
Baina ez dira kexak eta kezkak Kaxko Elkarteko kideek ahoan dituzten bakarrak, urtean zehar ‘bizirik’ dagoen elkartea da, eta ekintza asko antolatzen dituzte, bizilagunen ezinbesteko laguntzarekin. Horien artean nabarmentzen dituzte: Karmengo jaiak uztailaren 16an, musika-estimulazio goiztiarraren inguruko tailerrak, Euskal Jaiak...
Horrez gain, Udalarekin hartu-emanean dabiltza, eta ondorioz, hainbat eskaera onartzea lortu dutela diote: hainbat kaletako kimaketa lanak; Kaxkoko garbiketa berezia; aurreko urtean suhiltzaileen laguntzaz egindako simulakroa; Plaza Berri eta Tilosetako lurra hobetzea... Eta lan horretan jarraitzeko asmoa daukate, horregatik, udal ordezkaritza duten alderdiekin erronda hasiko dute, laster.
Txotx Batzordeetara ere azalduko dira, izan ere, ezinbestekoa ikusten dute «bizilagunen ahotsa entzunarazteko».
Komunikaziorako, bi bide
Herritarrei entzuteko gogoz daude, baita ere, eta horretarako, bi bide berri ireki berri dituzte. Alde batetik, web-orria egin dute, kaxkoelkartea.eus, eta bertan emango dute beraien jardueraren berri. Eta bestetik, Facebooken ere badira hemendik aurrera, helburu berarekin.
Kongresua, epe laburrean
Horrekin ez dira bukatzen, ordea, Kaxko Elkartearen planak. Kongresu bat egitea da epe laburrerako daukaten asmoa, gaueko arazo eta zaraten inguruko esperientziak batzeko eta ideiak elkartrukatzeko helburuarekin. Bertara gonbidatuko lituzteke: herri desberdinetako ordezkariak (hala nola Tolosa, Zarautz, Orio, Donostia... edota Espainiako beste hainbat), erakundeak eta politikoak, herritarrak eta Arartekoa bera.