Alde haundiarekin galdu zuen Hernanik atzo, irabazteko aukerarik gabe, VRAC Quesosen zelaian (55-5). Eta hala ere, ez zen guztiz txarra izan eguna, trikoloreentzako. Izan ere, galdu egin zuen Getxok ere, etxean, Gernikaren kontrako partidu klabea (23-40). Albiste txarra, Bartzelonatik jaso zuen Hernanik, etxeko taldeak ezustekoa eman baitzuen Cisnerosen kontra irabazita (41-26), erasoko bonusa eta guzti.
Hori horrela, ia seguru galduko du maila Sevillako Cienciasek (gaur jokatuko du Independienteren kontra, etxean), baina oraindik estuago daude gauzak, azkenaurreko posturako; jaitsierako play offa jokatzera derrigortzen duena. Azkeneko partiduan, Ciencias bera hartuko du Hernanik, Landaren, irabazi beharrekoa; baina galduko balu ere, irabazi egin beharko luke Getxok, Santboianaren zelaian, hernaniarrei aurrea hartzeko. Bartzelonak, Gernika bisitatuko du.
SAILKAPENA - Ohorezko Maila
9. Hernani, 30 puntu.
10. Bartzelona, 29 puntu.
11. Getxo, 27 puntu.
12. Ciencias, 18 puntu (partidu bat gutxiago jokatuta, gaurkoa).
Itxura kaxkarra eman gabe, Quesos nagusi atzo
Atzokoa, kontu askorik gabeko partidua izan zen Valladoliden. Ez zuen itxura kaxkarra eman Hernanik, eta gauza politak ere erakutsi zituen, baina bi taldeen arteko maila aldea, nabaria izan zen zelaian.
Oier Garmendiak lortu zuen trikoloreen entsaio bakarra, 54garren minutuan, kontrarioen akats bat aprobetxatuz.