Etxean egin beharreko lanak, ederki egin zituzten ereñotzuarrek, Gipuzkoako Herriarteko Txapelketan. Final laurdenetako bigarren saioa zuten, ostiralean Ur Mia elkartean; eta huts egiterik ez zeukatenez, ez zuten hutsik egin. 15-9 irabazi zioten, Oñatiko Txinparta I taldeari.
50 bat ikusleren aurrean, Iñaki Zelaia, Arnaitz Lasarte eta Aritz Zerain aritu ziren bertsota, Ereñotzuren aldetik; Mikel Peruarenak egin zituen gai jartzaile lanak; eta Julen Iriondo, Unai Erroitzenea eta Amaia Otxotorena aritu ziren epaile gisa. Oñatiko taldeak, berriz, Urko Egaña, Andoni Goitia eta Joseba Lasagabaster jarri zituen kantari.
Oñatiren menpe Ereñotzu, aurrera pasatzeko
Eta hain justu, Oñatiko bertsolariengan jarrita dauzkate beraien esperantzak, ereñotzuarrek, txapelketan aurrera egiteko. Izan ere, Oñati eta Asteasu-Zizurkilen artekoa izango da azkeneko saioa, multzo honetan; eta Ereñotzuk behar du Oñatik irabaztea, taldeko buru bukatu eta semifinaletara pasatzeko. Igandean daukate saioa, 14:00etan Oñatin.
Baina ez edozein emaitzarekin, gainera. 14-10 edo 15-9 irabazi beharko lukete oñatiarrek, horretarako. Izan ere, aurreneko saioa galdu egin zuen Ereñotzuk, Asteasu-Zizurkilen kontra; eta horrela, berdinketa hirukoitza izango litzateke.
«Oso zaila dago, baina badaukagu esperantzatxoa, hori gertatu eta gu semifinaletara pasatzeko», azaldu dute ereñotzuarrek: «edozein kasutan, gustora gaude egindakoarekin. Pixkanaka hobetuz joan gara txapelketan zehar, eta giroa ederra izan da saioetan».
Iker Ormazabal eta Andoni Mujika ondo, Eskolartekoan
Beste zita garrantzitsu bat ere izan zen asteburuan. Eskolartekoaren finala jokatu zuten Andoni Mujika eta Iker Ormazabal hernaniarrek, eta ondo aritu ziren biak. Hori bai, buruz burukoan, txapelaren lehian, ez zuten sartzerik izan.
Ormazabalek aurreneko finala zuen, baina lasai aritu zen, finalaz gozatzen. Mujikak, berriz, azkenekoa zuen Eskolartekoan, eta txapelaren lehian ibiltzeko asmotan joan zen, baina zortea ez zuen lagun izan.