ibon Fernandez Iradiren osasun egoerak nabarmen egin du okerrera azken sei hilabeteetan, eta senide eta lagunek egoera hau aldatzeko egin dituzten ahalegin guztiek, espetxe politikarekin egin dute topo. Hori salatzeko hainbat ekitaldi egin zituzten joan den astean zehar, bai Hernanin, eta baita inguruko herrietan ere. Horietako bat bi gutun bidaltzea izan zen: bat Madrileko Valdemoro kartzelako zuzendariari, eta bestea, Kartzeletako Idazkaritza Orokorrari; horrez gain, herritarrei ere dei egin diete gutun bidalketa masibo bat egin dezaten. Ostiralean berriz, azken ostirala izaki, kontzentrazioa egin zuten Plazan, eta bertan, gaixotasun larria duten euskal presoak izan ziren ardatza; tartean Ibon Fernandez hernaniarra. Larunbatean senide eta lagunek Zarautzen izan zuten zita. Munoa plazatik abiatuta, giza-katea egin zuten hondartzan zehar.
143 euskal preso gaixo, Frantzia eta Espainian
AAMk azaldu duenez, Fernandez hernaniarraren kasua ez da bakarra, 143 euskal preso baitaude gaixo Espainiako eta Frantziako espetxeetan: «112k gaixotasun fisikoren bat dute, eta gainerakoek laguntza psikologikoa beharrezkoa dute».
«Espetxe politikak
aldaketa behar du»
Ostiraleko kontzentrazioan adierazi zuten, espetxe politikak aldaketa bat behar duela, eta hori bultzatzeko, denen indarra beharrezkoa dela: «gaur egun bizi dugun momentu politikoak espetxe politikaren aldaketa eskatzen du. Preso gaixoak berehala kaleratu behar dira. Kondena betea dutenak etxeratu behar dira. Isolamendu eta bakartzeak bukatu behar dira. Bidea, guztion artean egin behar da».