begi gehienak bi gazteri begiratuko diote gaur, Santa Barbarako San Inazio egunean. Jon Elutxeta eta Suharri Paollak 14na urte dituzte, eta 50 kg-ko harriarekin erakustaldia egingo dute, 5 minutuan; jende aurreko beren lehen erakustaldia, hain zuzen ere. Beste gazte batek ere izango du protagonismoa, baina ez herri kiroletan; bertsoetan baizik. Eli Pagola hernaniarrak erronka polita du gaur, Santa Barbarako jendeari umorea jartzen. Beteranoen laguntza izango dute, ordea, bai batzuk eta bai besteek. Larrabide hor izango da, Imanol Paolla ondoan duela, aizkoran. Horiek hausten nahiko lan izango dute Larrak eta Arretxek. Bertsotan, Antton Garinek itzai lanak egin, eta Agin Rezolak eta Beñat Gaztelumendik lan egingo dute, gogotik Pagola gaztearen ondoan. Bertso eta herri kirolez gain, ordea, festa ederra antolatu du Morkaiko taldeak gaurko. Dianarekin hasi, bertso-saioarekin segi, eta meza garaian jendetza juntatuko da Santa Barbarako ermitan, 12:00etan. Herri kirolak, eta bertso-bazkaria izango dira ondoren. Bazkalostean bigarren saioa egingo dute bertsolariek, eta segidan, umeen jolasak eta toka, zahar eta gazteentzat. Erromeriarekin bukatuko dira aurtengoz, San Inazioak.
Herri kirolak, hiru zatitan
Herri kiroletan lehia bana egingo dute: aizkoran, txingekin, eta harri jasotzen. Txingekin, Joxe Mari Miñei astigartarra eta Mikel Azkoneta urnietarra ariko dira.
Aurpegi berriak
Jon eta Suharrik 14 urte dituzte, eta berriak dira, herri kiroletan. «Edozein heldu nekatzeko moduko lana» egingo omen dutela adierazi dio Kronikari Imanol Paollak, Suharriren aitak. «50 kg-ko harriari 30na altxaldi emango dizkiote, hortxe-hortxe. Hasi berriak dira, baina badaukate gaia». Suharrik aita izango du laguntzen, Imanol; besteak, osaba, Elutxetako Roke, harri jasotzea zer den badakiena. Larrari laguntzen ariko dena, Andoni Arretxe, bueltan dator aizkora mundura. Zenbaitentzat aurpegi berria izango da, baina ereñotzuarra aritua da lan honetan. Imanol Paollak Kronikari adierazi dionez, Hernanin herri kiroletako afizioa piztu nahi dute, eta edozein gaztek hasi nahi balu, bera prest dago erakusteko. «Harria, aizkora... materiala eta gogoa, ez ditugu falta!».
Toka, umeentzat ere bai
Famatu bihurtu da Toka Lehiaketa Santa Barbaran. Urtero egiten dute, beren kasa bazkaltzera joaten direnek. Orain arte helduek egiten zuten txapelketa, baina aurten umeek ere izango omen dute aukera parte hartzeko. 16:30-17:00ak aldera hasiko da.