Uholdeak zer diren ondo dakite hernaniarrek, eta ez da kasualitatea, atzo bertan kaleratutako azterketa batek dioenez, Hernani baita probabilitate gehien dituen herria, Gipuzkoa guztian. Hernani-Astigarraga-Donostia zonaldean, 24 uholde haundi erregistratu dira 1684 urteaz geroztik. Hernaniren kasuan, gainera, uholde horiek indar haundikoak izanez gero, arrisku larriak eragin ditzakete, ibai ertzean arrisku haundiko hiru enpresa daudelako.
Gipuzkoan, 35 arrisku zona
Azterketa hau bi erakundek egin dute, elkarlanean: Kantauriko Ur Konfederazioak eta Uraren Euskal Agentziak (URA). Azterketa honetan, Kantauri ekialdeko lurrak aztertu dituzte, eta 69 zonalde jo dituzte probabilitate haundiena dutenen artean; Gipuzkoakoak, 35.
Hasierako azterketa bat da egin dutena, eta helburu nagusi hau du: «administrazio guztiek batera lan egitea uholdeek ahalik eta kalte gutxien eragin ditzaten, bai pertsonei, bai ingurumenari, bai patrimonio kulturalari, eta bai aktibitate ekonomikoari».
Pertsonei kalteak
Uholdeek kalte ekonomiko haundiak eragin ditzakete, azterketaren arabera, baina pertsonentzako ere arriskutsuak izan litezke, kasu batzuetan. Hernaniko kasuan, ibai-ertzean arrisku haundiko enpresak izateak kalte pertsonalak eragin ditzake, uholde haundiak diren kasuetan.
Uholdeak ebitatzea ia ezinezkoa dela dio azterketak, baina gutxitzea posible da, bai kantitatea eta bai eragiten dituen kalteak. Orain arte egindako kanalizazio, presa edo dikeak ez ditu txartzat jotzen, baina aurrerantzean beste bide bat hartu beharko litzatekeela dio. Alegia, uraren leku naturalak (erriberak eta abar) ez gehiago okupatzea, eta zenbait kasutan, errekuperatzea.
Uholde datuak:
Uholde nagusiak Hernani-Astigarraga-Donostian
1684-1688-1915-1918-1926-1932-1933-1949-1953-1979-1980-1981-1983-1992-1995-1997-2002-2003-2004-2006
Arrisku haundieneko lekuak:
Hernani, Astigarraga, Donostia, Igara, Irun, Hondarribia, Oiartzun, Errenteria, Elgoibar, Mendaro, Deba, Mutriku, Villabona-Zizurkil-Aduna, Bergara, Andoain, Azpeitia, Zarautz, Urrestilla, Usurbil, Lasarte-Oria, Soraluze, Orio, Lazkao-Olaberria, Beasain-Ordizia-Arama-Itsasondo, Legazpi, Legorreta, Zumarraga, Urretxu, Eskoriatza, Arrasate, Alegia-Altzo, Ataun, Azkoitia, Lizartza, Tolosa-Ibarra, Amezketa, Behobia, Oñati eta Elgoibar.