«gipuzkoa izugarri aberatsa da, bai natura aldetik, eta bai kultura aldetik. Denetik badago: bertakoak eta etorkinak, bertako hizkuntza bat eta kanpokoak... natura ikaragarria da Gipuzkoan... baina hori, txikitzeko arriskua dago; hala egiten ari gara; eta gu gara protagonistak: orain, Gipuzkoan bizi garenok. Protagonistak, errudunak, eta arduradunak». Oskar Galianak xuabe hitz egiten du, baina zehatz. Hernanin bizi den billabonatarrak Ausnarketa egiten denbora daramaki, eta hori azaldu nahi du, argazki bidez eta marrazki bidez, Hernanin: Kide kafetegian. Erakusketa jarria dago dagoeneko, eta bi hilabetez jarrita egongo da, Kiden. 21 argazki eta marrazki batzuk dira, testu batzuk tartean dituztela. Pertsona argazkiak dira asko, eta autoretratoren bat ere badago. Gainerakoak paisajeak dira, Gipuzkoako paisajeak. «Errealitatea, eta protagonistak». Jarri izan ditu erakusketa gehiago Galianak. Gai berberarekin bigarren erakusketa du; garaira egokitua. Azken aldian argazkia gehiago erabiltzen du; hasierakoetan denak ziren pintura eta eskultura: «Donosticart-en jarri nuen lehenengoa. Beste lan batzuk ziren orduan, Exposición a los elementos. Gero hasi zen ideia berri honekin, eta Gipuzkoa Babilonia sortu zuen.
«Leku atsegin bat, bizi-ezin bihurtzen ari gara»
Galianak konparazioa egiten du Gipuzkoa eta Babiloniarekin. Leku ideal bat, aberatsa, natura espektakularra daukana... zertan ari gara bihurtzen? «Zientziaren izenean, progresoaren izenean egiten ari direnak, gure muturraren aurrean. leku bizi-ezin bihurtzen ari gara Gipuzkoa... guk egiten dugu hori, gu gara sujetuak, guk ematen dugu bozka... nola aldegin hortik?». Pertsona horiek azaltzen dira erakusketan; protagonista direnak. Gaur egungo Gipuzkoa direnak, eta Gipuzkoa horrelakoa egiten ari direnak. Ikuspuntu kritikoa da, eta jendeari parte hartzera deitzen dio. «Konsziente bagara, parte hartzen dugu gauzetan. Arduratsuago bihurtzen gara. Autolimitazio bat, autokontrol bat... beharrezkoak dira». Galiana Hernanin bizi da, eta oso eskertuta dago, Kide kafetegian erakusketa jartzen utzi diotelako.