Hernanin, kalitatezko ziurtagiria duten produktuak aurkeztu zituzten astearte arratsean Iparragirre sagardotegian. Sei ekoizle izan ziren bertan, eta banaka, euren lanaren nondik norakoak azaldu zituzten. Arantxa Eguzkitzak (Iparragirre) eta Jose Luis Medranok (Itxasburu) Eusko Labela duen sagardoa aurkeztu zuten; eta Iparragirreko Eguzkitzak, Labelaren barruan duten sagardo Ekologikoa ere bai. Telleri-Zahar baserriko Ramon Mugertzak gazta aurkeztu zuen, Idiazabalgo denominazioa duena, eta bi ziurtagiri dituen arkumea ere bai: Labelduna eta Ekologikoa. Berakorte baserriko Juanito Larburuk Euskal Baserri denominazioa duten barazkiak aurkeztu zituen. Ereñotzuko Mikeli Etxebestek berriz, Luma Gorri ziurtagiria duen oilaskoa. Eta azkenik, nahiz eta kalitatezko ziurtagiririk ez izan, Julian Urkiola eztigilea izan zen bertan. Ekoizle txikia izanik, ezin du ziurtagirik izan, baina gonbidatu egin zuten, erle-zainen lana azpimarratzeko. Eguzkitzak azaldu zuenez, astearteko aurkezpenean, elkarlan bateko aurreneko harria jarri zuten, eta gaineratu zuen, ekoizle gehiago ez biltzeak ez duela esan nahi gehiago ez daudenik. Azaldu zuenez, lanean jarraitzeko asmoa dute, eta udaberri aldera, azokatxoren bat egitea ere pentsatu dute.
Zein da garantia?
«Kontsumitzaileak eskuartean duen produktuak ziurtagiria edo zigilua badu, produktu hori kalitatezkoa dela bermatua dago; hori da kalitatezko ziurtagiri batek ematen duen garantia», hala azaldu zuen Eguzkitzak. Asteartean, aurkezpenetik kanpo geratu ziren ziurtagiririk ez duten Hernaniko ekoizleak, Eguzkitzaren esanetan, ziurtagiriak beste ahalegin bat eskatzen baitu: «ziurtagiria duten ekoizleek esfortzu eta saiakera haundiagoa egin behar dute. Gainontzekoek ez dituzten kontrolak pasa behar ditugu, EHNEk edo Kalitatea Fundazioak egiten dituenak».
Ramon Mugertza: «Garaian garaikoa ekoizten dugu»
Ramon Mugertzak 50 ardi ditu, eta garaian garaikoa ekoizten dutela adierazi zuen asteartean. Orain esaterako, ez dituzte mamia eta arkumea saltzen, garaiz kanpokoak baitira: «kongelatutako esnearekin egin daiteke mamia, baina niretzat, produktuak garaikoa izan behar du». Saltzeko orduan, ardi esnea enbolsatua saltzen dute, Hernaniko dendetan. Arkumea Ekologikoan egiten ere saiatzen direla adierazi zuen, baina gehiena Labelean saltzen dutela azaldu zuen. Eta azkenik, gazta gehiena, denda ekologikoetan saltzen zutela gaineratu zuen.
Juanito Larburu:
«Zomorroak hiltzeko beste zomorro batzuk erabiltzen ditugu»
Tomatea, letxuga, porrua eta tipulinak dira, Juanito Larburuk Euskal Baserri gisan ekoizten dituen barazkiak. Tratamenturik gabe ekoizten dituztela azaldu zuen herenegun, eta zomorroak hiltzeko duten formula ere kontatu zuen: «erleak edo abejorroak erabiltzen ditugu zomorroak hiltzeko, batzuk besteak hiltzen dituzte». Barazkiak Ezkerron saltzen ditu Larburuk, eta sobratzen dena, Bugatira eramaten du.
Mikeli Etxebeste:
«85 egunetan hazten ditugu oilaskoak, 1,8kg ingurukoak»
Etxebestek azaldu zuen, oilaskoak jaio eta hurrengo egunean ekartzen dizkiotela Ereñotzura. 1.300 oilaskoko bi nabe ditu bertan, eta argi gabe, ura eta janaria asko kontrolatuta hazten ditu. Oilasko bat hazteko 85 egun behar dituztela azpimarratu zuen, eta gutxi gora behera, 1,8kg ingurukoak egiten direla gaineratu zuen: «guk ez dugu engorderik erabiltzen, eta txikiagoak ateratzen badira, horiekin konformatzen gara». Lumagorri ziurtagiria dute bere oilaskoek, eta hiltzera Zerainera eramaten dituzte. Salmenta bertatik banatzen da, Etxebestek hazi besterik ez ditu egiten.
Arantxa Eguzkitza eta
Jose Luis Medrano:
«Eusko Labelak bertako
sagardoa dela ziurtatzen du»
Bi sagardo ekoizleek azaldu zuten, Eusko Label ziurtagiria duen sagardoak bi gauza bermatzen dituela: %100 bertako sagardoa dela, eta kalitatezkoa dela. Eguzkitzak azaldu zuen, sagardoak analitika berezi batzuk pasatzen dituela, kata itsu bat, eta enbotellatzeko ere baimendu egiten dela: «sagardogile askoren ametsa bete dugu, bertako sagarrarekin egindako sagardoa izatea. Horrez gain, Iparragirren, Ekologikoa eta Labela uztartzen dituen beste sagardo bat ere atera dugu».
Julian Urkiola: «erleek egiten dutena jasotzen dut»
Urkiolak etxeko kontsumorako egiten du eztia, eta ezer ez duela manipulatzen azaldu zuen: «erleek bere horretan egiten dutena jasotzen dugu». Akazia, gaztaina eta txillarraren eztia egiten dute bere erleek, garaian garaikoa.