karmen Eguna ospatuko dute larunbatean, uztailaren 16an, Kaxkoko bizilagunek. Festa gerra aurretik ere egiten bazen ere, urte askotan ez zen ospatu Hernanin. 2003an ordea, Kaxkoko bizilagunek berreskuratu zuten, eta ordutik urteroko hitzordua dute, Kardaberaz eta Kale Nagusiko bizilagunek. Festa eguna goizean goiz hasten da, eta aurten larunbata izaki, gauerdia pasa arte luzatuko da: diana, meza, makila aldaketa eta omenaldia, ume jokoak, karta saioa eta helduentzako jokoak, bazkaria, sardina jana eta dantzaldia dira, aurtengo ekitaldi nagusiak.
Alkate berria eta omendua,
eguneko protagonistak
Festa abiaraziko duen txupinazoari aurre hartuta, Dianak esnatuko ditu Kaxkoko bizilagun batzuk larunbata goizean, 09:00etan. Ordu berean, Agustindarren elizan izango dira beste batzuk, Karmen Eguneko meza entzuten. Ordubete beranduago, haurren txanda izango da: eguerdiko 12:00ak bitartean marrazki tailerra izango da, Plaza Berrin.
Goizeko ekitaldiek festa eguna girotuko duten arren, ofizialki, jai hasiera, eguerdiko 12:00etako txupinazoak markatuko du. Ondoren izango dira eguneko bi ekitaldi nagusiak: Alkate makila aldatzea eta omenaldia. 2011-2012ko Kaxkoko Alkatea Bixente Zaragueta, Kale Nagusiko hernaniarra izango da, besteak beste, Donostiako Aquariumeko presidentea dena. Makila orain arte, urtebetez, Alkate kargua izan duen Maria Teresa Azurmendiren eskutik jasoko du. Ondoren, omenaldiaren momentua izango da: Isabel Casco omenduko dute, joan den urtera arte Kaxko Elkarteko lehendakaria izan zena. Isabel Casco urte guzti hauetan Kaxko Elkartearen alde egindako lanagatik omenduko dute.
Makil aldaketa eta omenaldia bukatuta, Kaxko elkarteko epaimahaiak Kardaberaz eta Nagusiko balkoiak erreparatuko ditu, lehiaketako irabazlea aukeratzeko. Aurten, erakusleiho lehiaketa balkoi lehiaketak ordezkatu du, eta Kaxko Elkarteak dei egin die bizilagunei balkoiak apaintzeko.
Bazkaria, karta saioa eta jokoak, gaua bitarteko plana
Eguerdian elkarrekin bazkalduko dute Kaxkoko bizilagunek, Plaza Berrin. Txartelak Onddi tabernan daude salgai eta Migel Lujanbiok ere baditu. Indarrak berreskuratuta, karta saioen txanda izango da arratsaldeko 16:00etan. Karta jokoan emakumeek edo bikote mistoek bakarrik har dezakete parte. Ordubete beranduago, Gaztelu puzgarriak jarriko dituzte txikienentzat Plaza Berrin, eta 18:00etan txokolatea emango diete, meriendan. Ordu berean, Kale Nagusian, toka, igel aeta beste hainbat joku izango dira; kasu honetan, helduentzako. Afaldu aurretik, saria emango diote eguerdian epaimahaiak aukeratutako balkoi onenari eta politenari. Eta segidan hasiko da, tradizioa bihurtu den sardina jana. Plaza Berrin egingo da aurten ere, musikak lagunduta. Festa goizaldeko 01:00ak arte luzatuko da, Triki Ahots taldearen dantzaldiarekin.