Hernaniko emakume bat hil zuten atzo, goizeko 05:30ak aldera, Urbieta eta Izpizua kaleak bat egiten duten puntuan. Rosario Roman De la Fuente, 55 urteko hernaniarra, ustezko bikote ohiak hil zuen, labankadaz. Honen alaba, Yolanda Sanchez Roman 30 urteko hernaniarra ere zauritu zuen erasotzaileak, eta Donostiako Ospitalera eraman zuten. Ustezko hiltzaileak, 42 urteko Fredy Apolok, ihes egin zuen eta Udaltzaingoak eguerdiko 14:20etan atxilotu zuen, Portu auzoan. Ertzaintzaren arabera, Apolok aurrekariak zituen, tratu txarrengatik. Ertzaintzak hilketa aztertzen jarraitzen du.
«Ekintza hau eta
emakumeen aurkako
guztiak gaitzesten ditugu»
Luis Intxauspe Alkateak, Irantzu Jauregi Berdintasun Teknikariak eta Txoko Feministako bi kidek prentsaurrekoa eman zuten atzo eguerdian, hilketa gaitzetsi eta salatzeko. Alkateak azaldu zuen, emakumeen aurkako eraso berri bat dela atzo goizekoa, eta Udalak «duen indar guztiarekin, gogor gaitzesten» duela ekintza hau, eta emakumeen aurkako beste edozein ekintza. Udalak duen informazioaren arabera, eztabaida baten ondoren, ustezko hiltzaileak 55 urteko hernaniarra hil, eta bere alaba zauritu zituen, laban batekin. Intxauspek adierazi zuen, alaba Donostiako Ospitalean dagoela, eta eskuartean zuten azken informazioaren arabera, arriskutik kanpo dagoela.
Protokoloa, martxan
Hilketaren ondorioz, Udalak emakumeen aurkako indarkeria kasuetarako zehaztuta duen protokoloa jarri zuen martxan. Honen arabera, familiari laguntza juridikoa eta psikologikoa emango dio Udalak, eta momentuan momentuko laguntza ere emango diete.
Bozeramaile Batzordea,
ez ohiko Plenoa
eta kontzentrazioa, gaur
Udalak, Berdintasun Kontseiluak eta Txoko Feministak hainbat deialdi egin dituzte gaurko. Eguerdian, 12:00etan, Bozeramaile Batzordea bilduko da. Arratsaldean, 18:00etan, ez ohiko Udalbatza edo Plenoa egingo da, gertaera salatzeko. Eta azkenik, arratsaldeko 20:00etan, gaitzespen ekintza edo kontzentrazioa burutuko da Plazan.
Oposizioak bat egin du deialdiekin, eta hilketa eta erasoa gaitzetsi dute
EAJ, PSE-EE eta Hamaikabat alderdiek ere gogor gaitzetsi dute atzoko hilketa eta erasoa, eta prentsa ohar bidez, hiruek adierazi dute bat egiten dutela gaurko deitu dituzten ekitaldiekin. EAJ alderditik, Andoni Amonarraizek adierazi du bat egiten dutela gaur egun guztian egingo diren ekitaldiekin, hala nola, Bozeramaile Batzordearekin, Plenoarekin eta kontzentrazioarekin. Gaineratu du, zoritxarrez, beste genero indarkeria kasu baten aurrean gaudela, oraingo honetan, Hernanin bertan gertatutakoa, eta alderdiak gogor gaitzesten duela: «barru-barrutik salatu eta gaitzetsi nahi dugu atzoko hilketa eta erasoa partikularki, eta genero indarkeria orokorki, eta familiari gure dolumin eta babes guztia eskaintzen diogu». Alderdi sozialistako Estefania Morcillok gogor kondenatu du Rosario Romanen hilketa, eta alaba azkar sendatzea espero duela adierazi du. Morcillok gizarteari eskatu dio tratu txarrei aurre egiteko, eta gaurko kontzentrazioan Plaza betetzeko: «hernaniarrei etxean ez geratzeko eskatzen diet. Gaur Plaza hartu behar dugu, eta genero indarkeriari eta tratu txarrei elkarrekin egin behar diegu aurre, elkarrekin egin behar dugu oihu». Alderdi sozialistak ere bat egingo du gaurko deituta dauden ekitaldi guztiekin. Azkenik, Iñaki Arratibelek, Hamaikabaten izenean guztiz salatu du emakumearen erailketa eta alaba larri zauritu izana: «lehenik eta behin doluminik beroenak hildakoaren eta zauritutakoaren senitarteko eta lagunei. Aldi berean, zauritutako neska azkar sendatzea espero dut». Horrez gain, gaineratu du, eraso sexistak ez direla etxe barruko gaiak, eta erakunde zein herritarren inplikazioa beharrezkoa dela horrelako portaerak gizartetik desagertzeko: «hernaniarrak gaur eta datozen egunetan antolatuko diren ekintzetan parte hartzera animatu nahi ditugu, erailketa bortitz honen aurrean ezin baita beste aldera begiratu».