Dani Llopis
AIZKOLARI onenen jarduna ikusgai izango da gaur 12:30etatik aurrera Tilosetako frontoian. Elur Txori elkarteak antolatuta, Urrezko Aizkolarien Txapeldunen Ligako lehenengo lehia jokatuko dute Juan Jose Lopez Azpilikuetak, Urrezko Aizkorako aurtengo txapeldunak, eta Iñaki Azurmendik. 8 aizkolari onenak ari dira Liga honetan.
Urriaren 12an Basaurin jokatuko den finala dute helburu bi aizkolariek, eta bide horretan, lehenengo zita dute gaurkoa. A multzoan daude Azpilikueta eta Azurmendi, Olasagasti eta Larretxearekin batera, eta ligaxkako aurreneko postuan bukatzen duenak lortuko du finalera zuzenean sailkatzea. Bigarrenak, B multzoko bigarren sailkatuarekin borrokatu beharko du finalean aritzeko.
Tamaina ezberdinetako 10 enbor moztu beharko dituzte
Proba desberdinetan banatuta, 10 enbor moztu beharko dituzte Azpilikueta eta Azurmendik. Lehenengo bi probatan 45 ontzako bi enbor moztu beharko dituzte: ahalik eta kolpe gutxienean bata, eta ahalik eta denbora gutxienean bestea.
Zutik eta etzanda dauden enborrak mozteko abilidadea erakutsi beharko dute geroago bi aizkolariek. Zutik, 45 eta 54 ontzako enborrak izango dituzte; etzanda 45 eta 60 ontzako enborrak moztu beharko dituzte. Azkenik, iraupenezko proban, 45 ontzako 4 enbor moztu beharko dituzte bata bestearen atzetik.
Izeta IIa, harria jasotzen
Aizkolariek proba desberdinen artean atseden hartzen duten bitartean, Joxe Ramon Iruretagoiena, Izeta II, ariko da harria jasotzen. Lau harri ezberdinekin egingo du erakustaldia.