Donostiaraino iritsi ziren atzo Axeri Dantzaren doinuak, Atano IIIera

AXERI Dantzaren oihar­tzu­na iritsi zen atzo Atano IIIa pelotalekura. Emozioz bete­riko finalean, Hernanik 2-1 irabazi zion Donostiari, Her­nanitik joan­da­ko zaletu uhol­dearen bul­tzadarekin. Kade­teetan 22-10 galdu zuten Altuna anaiek; jubeniletan 22-5 irabazi, Lu­janbio eta Murgiondok; eta nagusietan 22-6 irabazi, Ojuel eta Go­rro­txategik.

«Uste baino errazago»
Josu Oiaga entrenatzailea­ren esanetan: «uste baino erra­zago ira­bazi degu. Kade­teek lan ona egin dute. Galdu bai, baina donostiarrak na­gusi zirela bagenekien; asko eutsi diete». Primeran beraz, bi anaiak. Jube­ni­le­tan Mur­gion­dok eta Lujanbiok ez zuten lan haun­dirik izan ira­bazteko; kolpean zegoen alde haundiena, eta Murgion­do­ren eskubiak brillo berezia due­la ikusi zen beste behin. «Ojuel eta Go­rro­txategik gero eta bikote sen­doagoa osatzen dute. Ojuelek bizi mugitzen du pelota eta de­fentsan oso azkarra da. Gorrotxak bolada izugarria daramaki». Gorro­txa­tegik aixa kendu zion au­ke­rako pelota Baez IIa aurre­la­ria­ri. Hernaniarrak 3 txapel baditu dagoeneko, Herriarte­ko Txapelketan.

Zaleak ere, txapeldun
Donostiaraino iritsi zi­ren atzo Hernaniko Axeri Dantzaren doinuak, eta Ata­no IIIa bi­hurtu zuten Her­na­niko Plaza. Dantzaren errit­moa ja­rri zutenak, herna­nia­rrak; pelo­tariak jokoan eta pe­lotazaleak kantuan. Etenik gabe kantatu zuten Axeri Dantza; azken partidua bukatzera zijoala, «txapeldunak, txapeldu­nak...». Do­nos­tiarrei irabazita, histo­rian laugarren aldiz jantzi zituzten hernaniarrek Herriar­teko txapel prezia­tuak.
Az­ken 12 urteetan Her­na­ni 8 al­diz iritsi da finalera, eta lautan irabazi; horrek adie­razten du zergatik jotzen du­ten, Gipuzkoako talderik go­go­rrena.
San Joan jai bete betean iritsi dira Hernanira txapelak. Izango dute non ospatu, pe­lotari eta pelo­ta­za­leek... Oia­gak adierazi duen bezala: «oso politta izan baita, San Joanetan txapelak Herna­nira ekartzea».

Urte askotako lana
Hamabi urtetan zortzi final; zortzi finaletan lau txapel. Marka hori ez da edozein mo­duzkoa, eta lana ondo egi­na­ren emaitzak dira, inondik inora. «Lana eta zortea, biak behar dira. Taldea ondo ari da; 60 federatu inguru ditugu, eta 6 bat lagun ari gara lanean, astero. Horrez gain, ordea, zortea ere behar da; pelotari onak atera dira, eta  hori ez da beti pasatzen», dio Oiagak.
Datorren urtean ere, talde zitala izango du Hernanik. «Murgiondok segiko du jube­ni­letan; nagusietan, debutik ez bada, bikote bera izango dugu; kadeteetan oraindik ez dakigu nola egongo garen». Datorren urtean ere, Axeri Dantza Donostiara?