Martxoaren 19an ospatuko du BagaGiltza herri plataformak «demokraziaren festa», herri galdeketa, alegia. Eta horretarako, sinadura-bilketa antolatu zuen BagaGiltza herri plataformak azaroaren 12an hasi, eta urtarrilaren 12ra arte.
Eta prentsaurrean eman zuten atzo azkeneko datua: «guztira 3.613 sinadura bildu dira». Eskerrak emateko ere, aprobetxatu zuten: «gure esker ona helarazi nahi diegu herri kontsultaren antolaketa babestu duten guztiei, eta baita, kontsultarekin bat ez egin arren, interesa adierazi dutenei ere». Sinadurak biltzen lagundu duten bolondresei ere, eman zizkieten eskerrak, eta laguntzen jarraitzeko deia egin zuten: «martxoaren 19rako behar zaituztegu!»
«Oso balorazio positiboa»
Ildo beretik, azaldu zuten «oso balorazio positiboa» egiten dutela bilketaren inguruan; «martxoaren 19an dugun erronkari oinarri sendoa ematen diolako». Beste hiru arrazoi ere eman zituzten: «beharrezkoa zen gutxieneko sinadura kopurua erraz gainditu da; herri galdeketaren aldeko mezuari hedapen garrantzitsua eman zaio; eta mahaien ingurura hurbildu diren pertsona guztien aldetik, izan sinatzearen aldeko ala ez, begirunea eta heldutasun demokratiko haundia sumatu da».
Sinadurak, notaritzan
Behin sinadurak bilduta, Notarioaren esku utzi dituztela iragarri zuten: «beren zuzentasuna egiaztatu dezan eta prozesuari dagokion legezkotasuna emateko akta jaso dezan». Ondoren, enpresa batek egingo du suntsiketa konfidentziala.
Hurrengo zita, larunbatean
Bukatzeko, hurrengo zitarako deia egin zuten. Batzar berezia egingo dute larunbatean, goizeko 10:00etan hasita, Biterin. Bi gai landuko dituzte: galdeketaren antolaketarena, eta galderaren onarpena. Bukatzeko, argazki erraldoia, 13:15etan.