Ez da Hernanin izango, baina zita seinalatua da korrikalari hernaniarren egutegian: bi aste barru, otsailaren 5ean, jokatuko da On Bosko Krosaren hirugarren edizioa, goizeko 11:00etan, Urnietan.
Eta seinalatua da, herrian izan gabe ere, partehartzaileen gehiengoa direlako hernaniarrak; aurreko urtean, bukatu zuten 143etatik, 30 ziren herrikoak. Baita bi irabazleak ere! Andoni Olazagirre nagusitu zen mutiletan, eta Maitane Guerrero nesketan. Biek lortu zuten, gainera, lasterketaren errekorra botatzea: 23 minutu eta 31 segundutan egin zuen Olazagirrek, eta 26 minutu eta 56 segundutan Guerrerok.
Aurten ere ekarriko dituzte txapelak, hernaniarrek? Eta lortuko al dute errekorra botatzea?
Aurreko urtean, 30 hernaniarrek hartu zuten parte, eta bi garaipenak ere ekarri zituzten Hernanira.
Ibilbidea, 7 kilometrokoa
Orain bi urte antolatu zuten lasterketa aurrenekoz, On Bosko egunaren bueltan, Salesiarren ikastetxearen 50garren urteurrena ospatzeko.
Eta aurreneko edizio horretan bezala, 7 kilometroko ibilbidea izango du lasterketak, aurten ere. Ikastetxetik abiatu, eta Urnietako kaleetan barrena ibiliko dira korrikalariak, Salesiarren ikastetxera bueltatzeko, bertan egongo baita helmuga. Bukaera, beraz, aldapa gora egingo dute... indarrak gorde behar!
Izenematea, zabalik
Proban parte hartzeko, dagoeneko zabalik dago izenematea, www.herrikrosa.eus web orrian, edo ikastetxeko idazkaritzan. 10 euro dira, eta izena ematearekin batera, kamixeta bana emango dute opari.
Egunean bertan ere izango da apuntatzeko aukera... tokirik geratzen bada. Izan ere, 150 partehartzailera mugatu dute izenematea aurten. Dorsalik geratzekotan, irteera gunean egongo da aukera, goizeko 09:30etatik 10:30etara; 15 euro izango dira.
Aurreneko hiru neska-mutilek jasoko dute saria, eta baita ikastetxeko aurreneko ikasleak ere. Baina gainerakoak ez dira esku hutsik joango! Makina bat opari zozketatuko dituzte, partehartzaile guztien artean: otorduak, haragia, ardoa...