Sutea izan zen aurreko larunbatean, Goizuetako Maio eta Maritxo etxeetan, eta gertatutakoaren aurrean, Udalak adierazi du, «baloratzekoa» dela, Goizuetako suhiltzaile eta bolondres taldeak «egoera hauen aurrean erakusten duten jarrera. Larunbatean ere argi geratu zen, beraien borondatea eta herriarekiko konpromisoa zenbaterainokoa den».
Modu berean, eskerrak eman dizkie, baita ere, «gertaeraren larritasuna ikusita, laguntza emateko asmoz gerturatu ziren herritarrei». Eta horrekin lotuta, gogoratu du suhiltzaileak direla, egoera horietarako formakuntza jaso dutenak, eta haien esanei kasu egitea garrantzitsua dela.
Udaletxeko ateak, zabalik
Azkenik, elkartasuna adierazi die Udalak, sutean kaltetutako familiei: «udaletxeko ateak zabalik dauzkazue, eta Udalaren baliabideak zuen esku, egoera zail honi aurre egiteko».