Pirinioak bixitatuko dituzte datozen bi asteburuetan Mendiriz Mendi elkarteko kideek. Asteburu honetan GR 11 ibilbideko aurreneko etapa egingo dute, Irundik Berara; hurrengoan, eskiatzera joango dira Pirinio frantsesera, Cauteretsera, hain zuzen.
Asteburu honetarako izenematea, bihar arte
Egun osoko plana egin du Mendiriz Mendi elkarteak igande honetarako. Euskal piriniotan kokatuta dagoen GR-11 ibilbideko aurreneko etapa egingo dute partehartzaileek.
Atsegindegin jarri dute elkartzeko zita goizeko 07:30etan, eta bertatik abiatuko dira Irunerantz. Berarako bidea egingo dute, eta eguerdian Beran bazkaltzeko asmoa daukate. Bihar arte dago izena emateko aukera: bazkideek 11 euro ordaindu beharko dituzte; bazkide ez direnek, aldiz, 14 euro.
Eskiatzera, datorren astean
Datorren astebururako, hilaren 28 eta 29rako, plan borobilagoa daukate. Edozein motatako eskia (iraupenekoa, alpinoa, eta erraketak) egiteko aukera izango dute bazkide eta ez bazkideek. Pirinio frantseseko Cauterets herrira joango dira, eta herrian bertan dagoen aterpe batean pasako dute gaua.
Larunbatean, hilaren 28an, goizeko 06:00etan abiatuko dira Atsegindegitik, eta igandean egingo dute buelta, arratsaldez.
Astelehenean ireki zuten eskiatzera joateko izena emateko epea, eta urtarrilaren 26an itxiko dute. Prezioak adinaren eta bazkidetzaren arabera izango dira, baina denek 30 euro aurreratu beharko dituzte apuntatzerakoan. Prezioaren barnean daude bidaia, afaria, lo egitea eta gosaria; forfaita, aldiz, ez da prezioan sartzen.
Informazio gehiago, bulegoan
Interesa duenak edo informazio gehiago behar duenak, astelehen, ostegun eta ostiraletan irekitzen du bulegoa Mendiriz Mendi elkarteak, 20:00etatik 21:00etara.