Atzo bertan ireki zituen ateak, Ergobiako Gurutzeta sagardotegiak. Beraz, hasiak dira aurtengo sagardo berria txotxetik ateratzen; «dira kalitatezko sagardoak, gorputza dutenak, lehengo urtekoak baino kolore gehixeagorekin, txinpartadunak eta afrutatuak, aroma haundikoak», azaldu du Joxe Angel Goñi sagardogileak.
Eta sagardoarekin batean, jakiak ere zaintzen dituzte. «Beti bilatu dugu kalitatezko produktua botiletan eta txotxean, eta sukaldean, mimoa. Orain arte, asko etortzen ziren sagardoa probatzera eta oraindik badira sagardoaren eboluzioa ikusteko maiz etortzen direnak. Baina egun, jateagatik eta turismoagatik ere etortzen dira».
«Euskal Sagardoa, etorkizuneko bidea»
Horrela, egokitzen jakin du Gurutzetak, baina izaera galdu gabe. «Azken urteetan sektorea ados jarri da, marka baten beharraz. Gorenak-ekin hasi ginen; denak ez geunden ados, baina bide bat markatu du, eta orain, jatorri-izendapenarekin lortu da adostasuna. Azken aukera izan daiteke, sagardogintza etorkizuneko bidean jartzeko».