Azkeneko fasean sartu da, Sorturen birfundazio prozesua. Hain justu, orain dute momentua, Kontseilu Nazionaleko kideak aukeratzeko. Eta horri begira, eztabaida gunea antolatu du Hernaniko Sortuk, asteazken honetan. Biteri kultur etxean izango da, arratsaldeko 19:00etan.
Bertan landuko dituzte, batetik, Kontseilu Nazionalerako hautagaitzak, eta bozkatzeko aukera ere izango da. Eta bestetik, emendakin partzialen eztabaida egingo dute, eta baita bozketa ere.
Urtarrilaren 20ko gauerdira arte dago bozkatzeko epea; bai zerrenda irekiko hautagaiak, eta baita emendakinak ere. Hori bai, gogorarazi dute, bozkatzeko akreditatua egon beharra dagoela, eta oraindik badagoela aukera, akreditazioa egiteko.
Eztabaida gunean izango da aukera, Kontseiluko kideak eta emendakinak bozkatzeko.
Dagoeneko badira 14 kide, Kontseilu Nazionalean; eta beste 15ak, zerrenda irekien bidez aukeratuko dituzte. Hasieran proposatu ziren 373 hautagaietatik, 38 geratzen dira, bozkatzeko. Tartean dira, Elena Beloki eta Marian Beitialarrangoitia hernaniarrak.
Urtarrilaren 21ean, Bilbora
Sortuk jakinarazi du, bestalde, urtarrilaren 21ean izango dela Kongresua Bilbon, eta joateko deia luzatu diete hernaniarrei. Elkarrekin bertaratzeko ere, kedada egingo dute.