2017ko txotx denboraldiari eman zioten hasiera aurreko larunbatean Paco Etxeberria mediku-forentseak eta Aranzadi zientzia elkarteko kideek. Hasiera honekin batera, Kaxko elkarteak luzatu du bere proposamena bolada berria denek gozatu dezaten. Izan ere, lehenik eta behin argitu dutenez, «Kaxko elkarteak Txotx denboraldia bezalako ekintzak babesten ditu, herria aktibo mantentzen dutelako eta lanpostuak sortzen dituztelako».
Jokaera zuzena duten tabernei, babesa
Ildo horretatik azaldu dute, jokaera zuzena duten tabernek beti izango dutela haien babesa: «beti izango dute gure babesa bizilagunen eskubideak errespetatzen dituzten tabernek, legeak esaten duena bete eta gauetan ateak eta lehioak itxita mantentzen saiatzen diren haiek, eta segurtasunagatik, ezarritako edukiera errespetatzen dutenek».
«Udalari eskatu diogu Udaltzaingoaren presentzia areagotzea, eta legea irmoki aplikatzea».
Elkarteak ere, badauzka beste hainbat kezka: «batzuen jarrera sexistak (hori desagertarazteko Udalak kanpaina bat jarri du martxan, gure babesa duena), gaueko zaratak, ekintza bandalikoak, erasoak, etab., baita orduan areagotzen den kaleko zikinkeria ere».
Hainbat eskaera, Udalari
Horrez gain, jakinarazi dute hainbat eskaera egin dizkiotela Udalari: «eskatu diogu Udaltzaingoaren presentzia areagotzea, eta legea irmoki aplikatzea».
Kanpainaren segida, eta proposamen berria
Elkarteak berak ere, hartu ditu neurriak: «aurten ere Kaxko garbia eta zaratarik gabekoa kanpainarekin jarraituko dugu (Udalaren eta Berriak elkartearen babesarekin), horregatik, bizilagunen laguntza eskatzen dugu, prest dauzkagun banderak jartzeko, batez ere, aurreneko pixuetan».
Proposamen berri bat ere badakarkite: «asmoa daukagu kongresu bat edo eztabaida foro bat antolatzekoa, arazoak konpontzen saiatzeko». Beraien intentzioa da Eusko Jaurlaritzako, Diputazioko edota antzeko arazoak dituzten Udaletako ordezkariak gonbidatzea, baita alderdi politikoak, tabernariak, bizilagunak, eta laguntzeko eta ideiak emateko prest dagoen edonor ere.