Hemen da 2017ko txotx denboraldia! Asteazkenean bertan emango diote hasiera Astigarragan, Sagardo Berriaren Eguna ospatuz, 24garrenez.
Sagardoetxean hasiko da ekitaldia, eguerdiko 12:00etan, eta bertan aurkeztuko dituzte uzta berria, sagarraren eta sagardo berriaren ezaugarriak, eta sagardo munduko gertaera nagusiak, Jesus Mari Santos alkatearen eskutik.
Txotx irekiera Eneko Atxak, Zapiain sagardotegian
Ondoren, sagarrondo berri bat landatuko du aurtengo gonbidatu bereziak, Eneko Atxa sukaldariak, Sagardoetxeko sagastian. Baina eguneko momenturik bereziena, txotx irekiera izango da: Zapiain sagardotegian elkartuta, aurreneko kupela irekiko du Atxak berak, «gure sagardo berria» oihu eginez. Eguerdiko 13:30etan hasiko da irekiera ekitaldia Zapiainen, txalapartarien deia, sagar dantza eta sagardogileen soka dantzarekin.
Eta ondoren, denboraldiko lehenengo sagardotegi menua ere dastatuko dute bertan.
Irekiera herrikoia, Murgia jauregian arratsaldean
Arratsaldean, berriz, Murgia jauregira mugituko da festa. Sukaldaritza tailerra izango da aurrena, familientzat, sagardotegiko menua prestatzen ikasteko; 18:30etan hasiko da. Izenemateak eta informazioa: 943 55 05 75 telefonoan edo info@sagardoarenlurraldea.com emailera idatzita.
Eta tailerra bukatzean, txotx irekiera herrikoia egingo dute jauregian bertan, pintxo eta sagardo dastaketarekin, musika eta kantuekin...