Urtarrilaren 7an hil zen Hiazinto Fernandorena Setien, 86 urte zituela. Duela 40 urtetik ezagutzen zuen Juanjo Uriak, eta haren izaera goraipatu nahi izan du, Kronikara ekarritako idatzi baten bitartez: «ezagutu nuenetik, estimuan izan dut Hiazinto, eta onartu behar dut, barrenak eragindako miresmena izan diodala beti», azaldu du Uriak.
Eta gaineratu du: «zaila da nire sentimendu hauen arrazoiak azaltzea, baina uste dut, izan dela beti gizon osoa ikusi dudalako. Euskara eta euskal kulturaren aldeko gauzetan nabarmendu da beti, baina pertsona bezala, bere ibilbide luzean defendatu dituen giza baloreak, eta premian zegoen jendearen alde, askotan hartu izan dituen konpromisoek, txunditu izan naute maiz, hamarkada hauetan», dio Uriak idatzian.
Hernaniko Udaleko itzultzaile eta euskera arduradun
Nabarmendu du, Lazkaon eskola euskaldun bat sortu zuela, Hernaniko Udaleko itzultzaile eta euskera arduradun izan aurretik. Udalekuen sorreran lan haundia egin zuen Fernandorenak, eta Gipuzkoako Ikastolen Elkartearen eta Gordailu editorialaren sortzaileetakoa izan zen, ikastoletarako material pedagogikoa sortzeko, Uriak gogora ekarri duenez. Eta nabarmendu du: «atera kontuak, zenbat zor dien gure herriak, hauei guztiei!».
«Nekaezina zen, hitz batean esan beharko balitz. Nondik ateratzen duk denbora, hainbeste ekintzatan buru belarri ibiltzeko?, esaten nion askotan», kontatu du Uriak.
Eta hari eskainitako bertso bat ekarri du gogora, Fernandorenari 2004an egin zioten omenaldian, hari kantatutako kopletan azkena; Hiazinto Gizakia tituluarekin, Eguzkiak urtzen du han goian doinuan:
Eta Hiazinto zer izan dugu
bere giza izaeran,
eredu eder askoak utzi
ditu bere jardueran,
eten gabeko jarrera zintzo,
adeitsu eta onberan,
baztertu askok aurkitu dute
babesa Hiazintorengan,
zenbat egintza on egin ote
ditu bere ibiliren,
pobreen alde eta presoak
bisitatuaz kartzelan,
beraz, agerian da gaur hemen
zertara etorri geran,
biluztu eta erakustera
zer izan den eta zer dan.