Galdetzeak ere ez duela merezi dio Batista Goikoetxeak; Elorrabiko sagardoa dator, «espeziala! Bakoitzak norberarena izaten du ona!». Bromatan bezala esaten badu ere, egiatik asko dauka, mimo haundia jartzen baitute: «terreno guztietan sagarra daukagu sartuta, eta horiez gain, biltzen ditugu sagarrak 6-7 baserritatik».
Prest daukate dena, hilaren 19an ateak irekitzeko, eta jendeak gogoa badaukala sumatzen du Arantxa Goikoetxea, alabak ere: «azaroan dagoeneko deika genituen! Gabonetan nahikoa ez, eta, gosez eta egarriz omen daude asko!».
«Tokia ona, sagardoa ona, jeneroa ona»
Elorrabira gerturatzen denak «goxo antzerako sagardoak» izango ditu aukeran, eta are jaki goxoagoak: «olagarroa eta xapoa, antxumea, etxean egindako postreak... izaten ditugu, enkarguz. Dakienak gauza berriak eskatzen ditu, eta ez dakienak, betiko menua. Gero, inbiritan izaten dira!». Beti izaten da aukera, berriro bueltatzeko. «Tokia ona, sagardoa ona, jeneroa ona» dutela ziurtatzen dute.